އިއްޔެ ކަރެކްޝަނަލް ސާވިސް އިން ހިންގި ސާޗު އޮޕަރޭޝަން ކުރިޔަށް ގެންދިޔުމަށް ބަންދުގައި ތިބި މީހުން ހުރަސް އެޅުމުން ބާރުގެ ބޭނުން ކޮށްފައިވާކަމަށް އިންސްޕެކްޓަރ އޮފް ކަރެކްޝަނަލް ސާވިސް އަހްމަދު މުޙައްމަދުފުޅު ވިދާޅުވެއްޖެއެވެ.
ހުކުރު ދުވަހުން ފެށިގެން މާފުށީ ޖަލުގެ އޮފިސަރުންނާއި ރިމާންޑު ބަންދުގައި ތިބި މީހުންނާއި ދެމެދު ހިތްހަމަނުޖެހުންތަކެއް ހުރިކަން އިނގިގެން އެކަން މޮނިޓަރ ކުރަމުން ދިޔަކަމަށް އިންސްޕެކްޓަރ އޮފް ކަރެކްޝަނަލް ސާވިސް އަހްމަދު މުޙައްމަދުފުޅު ވަނީ ވިދާޅުވެފައެވެ.
އެގޮތުން ހުރި ކަންބޮޑުވުންތަކާއި ގުޅިގެން އޮފިޝަރުން ގޮޅިތައް ކައިރިއަށް ދިއުމުން އެކިކަހަލަ ކާތަކެތި ޖަހާކަމަށާއި އޮފިޝަރުންގެ ވާޖިބުތަކަށް ހުރަށް އަޅާކަމުގެ މައުލޫމާތު ލިބިފައިވާކަމަށް އަހްމަދު ވިދާޅުވިއެވެ. މިކަންކަން ބެއްލެވުމަށް ކޮމިޝަނަރ އޮފް ޕްރިޒަންސް އަބްދުﷲ މުނާޒުގެ އެދުމަކަށް މާފުށީ ޖަލަށް އިއްޔެ ދިޔަކަމަށް އަހްމަދު ވިދާޅުވިއެވެ.
އިއްޔެ ގޮޅިތައް ބަލާ ފާސްކުރިއިރު އޮބްޒާވް ކުރިކަމަށާއި ސާޗު އޮޕަރޭޝަން ކުރިޔަށް ގެންދިޔުމަށް ބަންދުގައި ތިބި މީހުން ހުރަސް އެޅުމުން ބާރުގެ ބޭނުން ކުރިކަމަށާއި އިއްޔެ ހިނގާދިޔަ ކަންކަމުގެ ހަޤީގަތް އޮޅޭގޮތަށް އެމަނިކުފާނުގެ ނަން ބޭނުންކޮށްފައިވާތީ އެކަމާ ހިތާމަ ކުރައްވާކަމަށް އިންސްޕެކްޓަރ އޮފް ކަރެކްޝަނަލް ސާވިސް އަހުމަދު މުޙައްމަދުފުޅު ވިދާޅުވިއެވެ.
އިންސްޕެކްޓަރ އޮފް ކަރެކްޝަނަލް ސާވިސް އަހުމަދު މުޙައްމަދުފުޅު މިހެން ވިދާޅުވެފައި މިވަނީ މާފުށި ޖަލުގައި ރިމާންޑުގަ ތިބި މީހުންނާއި، ކަރެކްޝަންސްގެ އޮފިސަރުންނާއި ދެމެދު ކުރިމަތިލުމެއް ހިނގާފައި ނުވާ ކަމަށް ކަރެކްޝަންސްސް އިން ބުނެފައި ވަނިކޮށެވެ.
އިންސްޕެކްޓަރ އޮފް ކަރެކްޝަނަލް ސަރވިސް އަކީ މީހުން ބަންދުކުރާތަންތަނުގެ ޙާލަތާއި އެތަންތަނުގައި ކަންހިނގާގޮތް ބަލާ މިނިސްޓަރ އޮފް ހޯމްއެފެއާޒަށް ރިޕޯރޓްކުރުމަށްޓަކައި މިނިސްޓަރ އިމްރާން 2019 މެއި 19 ވަނަ ދުވަހު އައްޔަންކޮށްފައިވާ މީހެކެވެ.
