ބޯ ވާރޭއާއެކު ގދ. ގައްދޫގައިވެސް ފެންބޮޑުވެއްޖެއެވެ.
އެމްއެންޑީއެފްއިން ވިދާޅުވީ، ދެކުނުގެ އަތޮޅުތަކަށް ކުރަމުންދާ ވިއްސާރައިގައި ގދ. ގައްދޫގެ ބައެއް ސަރަޙައްދުގައި ފެންބޮޑުވެ ގޭގެއަށް ފެން ވަމުނާއި ގުޅިގެން ފެން ހިއްކުމުގެ މަސައްކަތް ސަދާން އޭރިއާގެ ސިފައިން ކުރަމުންދާކަމަށެވެ.
އަދި ގޭގެއަށް އިތުރަށް ފެންވަނަ ނުދިނުމަށްޓަކައި ވެލި ބަސްތާ ޖެހުމުގެ މަސައްކަތް ކުރަމުންދާކަމަށްވެސް އެމްއެންޑީއެފްއިން ވިދާޅުވިއެވެ.
ގައްދޫ ކައުންސިލްގެ މެންބަރު އާމިރު ޢަބްދުﷲ މިނޫހަށް ވިދާޅުވީ، މިވިއްސާރާގައި އެރަށުގައި ފެން ބޮޑުވެ 40 ގެއަކަށް ގެއްލުން ވެފައިވާއިރު، އެރަށުގެ އެއްގެއަކަށް ވަރަށް ބޮޑަށް ގެއްލުންވެފައިވާއިކަމަށެވެ. އެހެންނަމަވެސް ދިރިނޫޅެވޭ ވަރަށް އެއްވެސް ގެއަކަށް ގެއްލުން ނުވާކަމަށްވެސް އޭނާ ވިދާޅުވިއެވެ.
އަދި އާމިރު ވިދާޅުވީ، ރޭ އިރާކޮޅުން ފެށިގެން އެރަށަށް ބޯކޮށް ވާރެވެހޭކަމަށާއި ވާރޭ ވެހުން ހުއްޓާލާފައިވަނީ މިއަދު ހަވީރު 04:30 ހާއިރުކަމަށެވެ.
އެރަށުގައި ބޮޑުވެފައިވާ ފެންގަނޑު މިހާރު ކޮންޓްރޯލް ކުރެވިފައިވާއިރު، އިތުރަށް މޫސުން ގޯސްނުވާނަމަ ކުރިއަށް އޮތްތާ އިތުރު ގެއްލުމެއް ނުވާނެކަމަށެވެ. އެރަށުން ފެން ހިންދުމުގެ މަސައްކަތުގައި ފުލުހުންނާއި، ސިފައިންނާއި ރަށުގެ ގިނަ އަދަދެއްގެ ރައްޔިތުން ބައިވެރިވަމުން އަންނަކަމަށްވެސް އާމިރު ވިދާޅުވިއެވެ.
