މިދިޔަ ހޮނިހިރު ދުވަހު ދިވެހިރާއްޖޭގައި ބޭއްވި ރައްޔިތުންގެ މަޖިލީހުގެ އިންތިޚާބުގެ ވަގުތީ ނަތީޖާ އިއުލާން ކުރަން އިލެކްޝަންސް ކޮމިޝަނުން ތައްޔާރުވެއްޖެއެވެ.
އިލެކްޝަންސް ކޮމިޝަނުން ދާދި ދެންމެ ވިދާޅުވީ، ރައްޔިތުންގެ މަޖިލިސް އިންތިޚާބު 2019 ގެ ވަގުތީ ނަތީޖާ އިއުލާން ކުރުން މިއަދު މެންދުރު ކުރިން 11:30 އިން ފެށިގެން އިންތިޚާބީ މަރުކަޒު (ބައު ޖަމާލުއްދީން) ގައި ފެށިގެން ކުރިއަށް ދާނެ ކަމަށެވެ.
އިންތިޚާބުގެ ވަގުތީ ނަތީޖާ އިއުލާން ކުރަން އިލެކްޝަންސް ކޮމިޝަނުން ތައްޔާރުވިއިރު، މިފަހަރު އެހެން ފަހަރުތަކާ ޚިލާފަށް ވަކި ފޮށިތަކުގެ ނަތީޖާ އިއުލާނެއް ނުކުރާނެއެވެ. އިލެކްޝަންސް ކޮމިޝަނުން އިއުލާން ކުރާނީ ހަމައެކަނި ދާއިރާގެ ޖުމްލަ ނަތީޖާއެވެ.
މިފަހަރު ވަކި ފޮށީގެ ނަތީޖާ އިއުލާން ނުކުރަން ނިންމައި، އެލެކްޝަންސް ކޮމިޝަނުން ވަކިފޮށިތަކުގެ ނަތީޖާއަށް ހާއްޞަ ވެބްސައިޓެއް ތައާރަފް ކުރިއެވެ. ނަމަވެސް ވަގުތީ ނަތީޖާ އިއުލާން ކުރުމާ ހަމައަށް އައި އިރުވެސް ހުރިހާ ފޮށްޓެއްގެ ނަތީޖާ އެ ވެބްސައިޓަށް އަޕްލޯޑް ކޮށްފައެއް ނުވެއެވެ.
މީޑިއާތަކުން ހާމަކޮށްފައިވާ ވަގުތީ ނަތީޖާތައް ދައްކާގޮތުން, ރައްޔިތުންގެ މަޖިލީހުގެ 87 ދާއިރާގެ ތެރެއިން 65 ދާއިރާގެ ގޮނޑިތައް ކާމިޔާބު ކޮށްފައިވަނީ ސަރުކާރު ހިންގާ މައި ޕާޓީ، އެމްޑީޕީގެ ކެންޑިޑޭޓުންނެވެ. އަދި މިނިވަން ކެންޑިޑޭޓުން 7 ގޮނޑި ކާމިޔާބު ކުރެއްވިއިރު، ޖުމްހޫރީ ޕާޓީ އަދި ޕީޕީއެމް އަށް ކާމިޔާބު ކުރެވިފައިވަނީ 5 ގޮނޑިއެވެ.
ޕީއެންސީއަށް 3 ގޮނޑި ކާމިޔާބު ކުރެވުނުއިރު އަދާލަތު އަދި ޑީއާރުޕީއަށް އެއްވެސް ގޮނޑިއެއް ކާމިޔާބު ކުރެވިފައެއް ނުވެއެވެ.
