ކައުންސިލަރުންގެ ދައުރު ދިގުކުރުމުގެ މައްސަލައިގައި ސުޕްރީމް ކޯޓުގެ ލަފައެއް ހޯދަން ފާސްކޮށްފިއެވެ.
ރައްޔިތުންގެ މަޖިލީހުގައި މިރޭ ބޭއްވި ޖަލްސާގައި މިގޮތަށް ނިންމައިފައިވަނީ، ކޮވިޑް-19ގެ ސަބަބުން ލޯކަލް ކައުންސިލްތަކުގެ އިންތިހާބު ނުބޭއްވި މިހާރު ތިބި ކައުންސިލަރުންގެ ދައުރު ހަަމަވާއިރު އަލަށް އިންތިހާބުވާ ކައުންސިލަރުން މަގާމާއި ހަވާލުނުވެ ގާނޫނީ ހުސްކަމަކަށް ހިނގައިދާނެ ކަމުގެ ބިރު ހީވެފައި ވަނިކޮށެވެ.
މިގޮތުން މިމައްސަލަ ރައްޔިތުންގެ މަޖިލީހަށް ހުށަހަޅައި މިކަމަށް ހައްލެއް ހޯއްދެވުމަށްޓަކައިވަނީ ގާނޫނު އަސާސީ އިސްލާހު ކުރުމުގެ ބިލެއްގެ އިތުރުން ކައުންސިލަރުންގެ ދައުރު ދިގު ކުރުމުގެ ސަންސެޓް ގާނޫނެއްގެ ބިލެއް ހެންވޭރު ހުޅަނގު ދާއިރާގެ މެންބަރު ހަސަން ލަތީފު ހުށަހަޅުއްވައިފައެވެ. ނަމަވެސް މިދެގޮތާއިމެދުވެސް ބޮޑު ބަހުސްއަކަށް ގޮސް މަޖިލީހުން މިރޭވަނީ މިކަމާއި ބެހޭގޮތުން ސުޕްރީމް ކޯޓުގެ ލަފައެއް ހޯދުމަށް ފާސްކޮށްފައެވެ.
ހަނިމާދޫ ދާއިރާގެ މެންބަރު އަބްދުލް ޣަފޫރު މޫސަ ހުށަހަޅުއްވާފައިވާ ގަރާރުގައިވާ ގޮތަށް ސުޕްރީމް ކޯޓުގެ ލަފައަކަށް އެދެން މަޖިލީހުން ފާސްކުރީ 61 މެންބަރުންގެ ވޯޓުންނެވެ.
ސުޕްރީމް ކޯޓުގެ ލަފަޔެއް ހޯދުމަށް މަޖިލީހުން ނިންމައިފައި މިވަނީ، ދައުލަތުގެ ބަންޑާރަ ނައިބު އިބްރާހިމް ރިފްއަތާއި މަޖިލީހުގެ ކައުންސިލަ ޖެނެރަލް ފާތިމަތު ފިލްޒާގެ ލަފާވެސް ހޯދުމަށް ފަހުގައެވެ. މި ދެފަރާތުން ލަފާދީފައިވަނީ ގާނޫނު އަސާސީ އިސްލާހުކޮށް ކައުންސިލަރުންގެ ދައުރު ދިގު ކުރުމަށެވެ.
މިހާރު އިންތިހާބުވެފައިވާ ކައުންސިލަރުންގެ ދައުރު ހަމަވާނީ އަންނަމަހުގެ ދެވަނަ ދުވަހުއެވެ.
