ރާއްޖޭގެ ހުރިހާ ސަރަހައްދެއްގައި މޫސުން ގޯސްވެ މާލެ އާއި އަތޮޅުތެރޭގެ ބައެއް ރަށް ރަށަށް އާދަޔާ ހިލާފަށް ބޮޑަށް އުދަ އަރަމުން އެބަދެއެވެ.

މިހާރު ރާއްޖޭގެ މޫސުން ގޯސްވެފައިވާ އިރު، ލ. މާވަށުގެ ބޮޑު ސަރަައްދަކަށް އުދައިގެ އަސަރުކޮށް، ތަކެއްޗާށާއި މީހުން އުޅޭ ގޯތި ގެދޮރަށް އެތައް ބޮޑެތި ގެއްލުމެއްވަނީ ލިބިއްޖެއެވެ.

މާވަށު ކައުންސިލުގެ ރައީސް، އަޙްމަދު މޫސާ މި ނޫހަށް މައުލޫމާތު ދިންގޮތުގައި، އިއްޔެއިންސުރެ މިއަދު ހެނދުނުގެ 8:00 އާއި ހަމައަށް، އެރަށް އުދައިގެ އަސަރު ވަރަށް ބޮޑަށް ކޮށްފައިވެއެވެ. އެގޮތުން އުދައެރުމުގެ ސަބަބުން، މީހުންއުޅޭ ގޯތި ގެދޮރަށާއި، ސްކޫލަށް އަދި ރަށުގެ ބޮޑެތި މަގުތަކަށް ބޮޑެތި ގެއްލުންތަކެއް ލިބުމުގެ ސަބަބުން، މިވަގުތު ރައްޔިތުން ތިބީ ވަރަށް ބޮޑު ބިރުވެރިކަމެއްގައި ކަމަށް ކައުންސިލުގެ ރައީސް މައުލޫމާތު ދިނެވެ.

އުދައިގެ ސަބަބުން، ރަށުގެ މީހުން ދިރުއުޅޭ ގިނަ ގެތަކަށް ފެންގަނޑު ވަދެފައިވާއިރު، އައިސް އަލަމާރި ފަދަ ތަކެތި ހަލާކުވެފައިވާކަމަށްވެސް ކައުންސިލުގެ ރައީސް ފާހަގަކުރިއެވެ. އަދި ބައެއް ގެތަކުގެ ފޫޓު ފާރުތައްވެސް ވެއްޓިފައިވާކަމަށް ކައުންސިލުން މައުލޫމާތު ދިނެވެ.

ކައުންސިލުގެ ރައީސް ވިދާޅުވީ، އިއްޔެއިން ފެށިގެން ރަށަށް އުދައިގެ އަސަރު ކުރަމުން ދިޔައިރު، ހެދިފައިވާ ބޮޑު ފެންގަނޑު ހިންދުމުގެ މަސައްކަތާއި، ސާފުކުރުމުގެ މަސައްކަތް ރަށުގެ ރައްޔިތުންނާއި ގުޅިގެން މިހާރު ކުރެވެމުންދާ ކަމަށެވެ.

އެމްއެންޑީއެފް ގެ ބޭފުޅުން މިއަދު 9:30 ހާއިރު އެރަށް އައިސްފައިވާކަމަށް ކައުންސިލުން ވިދާޅުވިއެވެ. އުދަ އެރުމާއި ގުޅިގެން، ރަށުގެ ބައެއް ސަރަހައްދުގެ މަގުތަކާއި ބައެއް ގެ ތަކުގައި ވެލި ބަސްތާ ޖެހުމުގެ މަސައްކަތުގައި އެމްއެންޑީއެފް ސެންޓްރަލް އޭރިއާގެ ސިފައިން މިހާރު ހަރަކާތްތެރިވަމުން އެބަދެއެވެ.

މީގެ އިތުރުން، މާދަމާވެސް ވަރަށް ބޮޑަށް އުދައަރާނެ ކަމަށް ލަފާކޮށްފައިވާތީވެ، ރަށުގެ ރައްޔިތުންގެ ތިބީ ހާސްކަމާއި ކަންބޮޑުވުމެއްގެ ތެރޭގައި ކަމަށް ކައުންސިލުގެ ރައީސް ވިދާޅުވިއެވެ. އެހެންކަމުން، އުދައިގެ އަސަރު ކޮށްފައިވާ ސަރަހައްދުގެ ރައްޔިތުން ރައްކާތެރި ސަރަހައްދުތަކަށް ބަދަލުކުރެވުމުގެ މަސައްކަތްވެސް މިހާރު ކުރެވެމުންދާކަމަށް މައުލޫމާތު ދިނެވެ.

ރާއްޖޭގެ ބޮޑު ސަރަހައްދަކަށް އުދައަރާނެ ކަމަށް ލަފާކޮށް މެޓް އޮފީހުން އިއްޔެ ބުނެފައި ވަނީ، ދެކުނު އިންޑިއާ ކަނޑުގައި އުފެދިފައިވާ ދިގު ބާނިތައް ރާއްޖެއާއި ހަމައަށް ފޯރާނެކަމަށެވެ. އެގޮތުން ކުރިއަށް އޮތް 3 ދުވަހު ދެކުނާއި މެދު ރާއްޖެތެރޭގެ ބައެއް ރަށްތަކަށް ރާޅުއެރުމުގެ ފުރުސަތު ބޮޑު ކަމަށާއި ދިޔަވަރު ބޮޑުވާ ގަޑި ތަކުގައި މިކަމުގެ އަސަރު ބޮޑުވާނެކަމަށެވެ.