ރައްޔިތުން މަޖިލީހުގެ އިތުރު މުވައްޒަފަކު ކޮވިޑް-19 އަށް ޕޮޒިޓިވް ވެއްޖެ އެވެ.
ރައްޔިތުން މަޖިލީހުގެ އިތުރު މުވައްޒަފަކު މިއަދު ކޮވިޑަށް ޕޮޒިޓިވް ވެފައިވާކަން މަޖިލިސް އިދާރާގެ މީޑިއާ ޑައިރެކްޓަރ ވަނީ މި ނޫހަށް ޔަޤީން ކޮށްދެއްވާފައެވެ.
މަޖިލީހުގެ މީޑިއާ ޑައިރެކްޓަރ "ފެށުން" އަށް ވިދާޅުވީ މިއަދު ހެނދުނު ޕޮޒިޓިވް ވެފައިވަނީ ރައްޔިތުންގެ މަޖިލީހުގެ ކޮމެޓީއެއްގައި މަސައްކަތް ކުރައްވާ މުވައްޒަފެއް ކަމަށެވެ. މި ނޫހަށް އިތުބާރު ހުރި މަސްދަރަކުން އިނގިފައިވާ ގޮތުގައި މިއަދު ޕޮޒިޓިވް ވެފައިވަނީ މަޖިލީހުގެ އިޖްތިމާއީ ކޮމެޓީގައި މަސައްކަތް ކުރައްވާ މުވައްޒަފެކެވެ.
ރައްޔިތުންގެ މަޖިލީހުގެ އިދާރާ ޑިސްއިންފެކްޓު ކުރުމުގެ މަސައްކަތް ކުރިޔަށް ދާކަމަށާއި އެ މުވައްޒަފުގެ ކޮންޓެކްޓް ޓްރޭސިންގެ މަސައްކަތް އެޗްޕީއޭ އާއި ގުޅިގެން ކުރައްވަމުން ގެންދަވާ ކަމަށްވެސް މަޖިލީހުގެ އިދާރާއިން ވަނީ ވިދާޅުވެފައެވެ.
މީގެ ކުރިން މަޖިލީހުގެ 2 މުވައްޒަފަކު ކޮވިޑް-19 އަށް ޕޮޒިޓިވް ވެފައިވީނަމަވެސް މިހާތަނަށް މަޖިލިސް މެންބަރެއް ކޮވިޑަށް ޕޮޒިޓިވް ވެގެން ރިޕޯޓު ކޮށްފައި ނުވެއެވެ.
ރާއްޖެއިން މިހާތަނަށް 2913 މީހުން ކޮވިޑަށް ޕޮޒިޓިވް ވެފައިވާއިރު 2340 މީހުން ވަނީ ރަނގަޅުވެފައެވެ. ކޮވިޑް ޖެހިގެން ރާއްޖެއިން މަރުވެފައިވަނީ 15 މީހުންނެވެ.
