ރާއްޖޭގައި ދިރިއުޅެމުން އަންނަނިކޮށް ހައްޔަރުކުރި ޔަމަނުގެ ރައްޔިތެއް ކަމުގައިވާ ޔާސިރު ޔަހްޔާ ސާލިހް، ގެ ހާލު ސީރިއަސްވެގެން އިމަޖެންސީ ފަރުވާދެމުން އެބަދެއެވެ.

ޔާސިރު ޔަހްޔާ ސާލިހް އަށް އެމެޖެންސީގައި ފަރުވާދެމުންގެންދާ ކަމަށް މޯލްޑިވްސް ކަރެކްޝަނަލް ސާވިސްގެ މީޑިއާ އޮފިޝަލް ވަނީ މިނޫހަށް ކަށަވަރުކޮށްދެއްވާފައެވެ.

މިނޫހުން ކުރި ސުވާލަކަށް ޖަވާބުދެއްވަމުން މޯލްޑިވްސް ކަރެކްޝަނަލް ސާވިސްގެ މީޑިއާ އޮފިޝަލް ވިދާޅުވީ އޭނާއަށް މިރޭ 6:17 ހާއިރުން ފެށިގެން އައިޖީއެމްއެޗްގެ އިމަޖެންސީގައި ފަރުވާ ދެމުންދާ ކަމަށެވެ.

ޔާސިރުއަށް އިމެޖެންސީގައި ފަރުވާދެމުންގެންދަނީ ކޮން ކަހަލަަ ސިއްހީ މައްސަލައެއްދިމާވެގެން ކަމަށް ކަރެކްޝަނަލް ސާވިސް އިން ހާމައެއް ނުކުރައްވައެވެ.

"މިހާރު ފަރުވާދެމުން ދަނީ، ވަކި ވެންޓިލޭޓަރއެކޭ އަޅުގަނޑަށް ނެތް ދެންނެވޭކަށެއް، އަދި ހާލަތު ހުރި ގޮތުން، އަޅުގަނޑަކަށް އެކަމާއި ބެހޭ ގޮތުން ފަރުވާ ކުރިއަށްދާތީ ވަކި އެއްޗެއް ދެންނެވޭކަށް ނެތް". ޔުސްރީން ވިދާޅުވިއެވެ.

ދިވެހި އަންހެނަކާ ކައިވެނި ކޮށްގެން ރާއްޖޭގައި ދިރިއުޅެމުން އަންނަނިކޮށް 2017 ވަނަ އަހަރު ހައްޔަރުކުރި ޔާސިރު ޔަހްޔާ ސާލިހް، އަކީ އަހުމަދިއްޔާ ސްކޫލުގައި އަރަބި ބަސް ކިޔަވައިދޭ ޓީޗަރެއްގެ ގޮތުގައި ކުރިން އުޅުނު މީހެއްވެސް މެއެވެ. އެ ކައިވެންޏަށް ކުއްޖަކުވެސް ލިބިފައިވެއެވެ.

ނިމިދިޔަ އަހަރުގެ ޖަނަވަރީމަހު ހޯމް މިނިސްޓަރު އިމްރާން އަބްދުﷲ ވިދާޅުވީ ޔާސިރުގެ މައްސަލައިގައި ސީރިއަސް ކަންތައްތަކެއް އެބަހުރި ކަމަށާއި އަދި އެކަން ފަހުން ހާމަކުރައްވާނެ ކަަމަށެވެ. ނަަމަވެސް މިހާތަނަށްވެސް އެއްވެސް މައުލޫމާތެއް އެކަމާ ގުޅޭ ގޮތުން ހާމަ ކުރައްވާފައެއް ނުވެއެވެ.

އޭރު މިނިސްޓަރު އިމްރާން ވިދާޅުވީ، ޔާސިރު ޔަހުޔާއާ ޓެރަރިޒަމާ ގުޅުން ހުރިކަން ބައިނަލްއަގުވާމީ މީޑިއާގައި ވެސް ފެންނަން އެބަހުރި ކަމަށާއި އޭނާއާ ބެހޭ މައުލޫމާތު ފުލުހުންނަށް ލިބި އިމިގްރޭޝަނަން އެންގުމުން ކޮންޓްރޯލާ އަށް ލިބިވަޑައިގެންފައިވާ ބާރުގެ ދަށުން، ޔާސިރު ރާއްޖެ ދޫކޮށް ދާން އެންގުމުން ޕާސްޕޯޓް ފޮރުވައި، ފުރައިގެން ދޭން އިންކާރުކުރީ ކަމަށެވެ. މިނިސްޓަރު އިތުރަށް ވިދާޅުވީ، 2017 ވަނަ އަހަރުގެ މާރޗްމަހުގެ 03 ވަނަ ދުވަހުން ފެށިގެން އިމިގްރޭޝަންގެ ބެލުމުގެ ދަށުގައި އެ ހުންނަނީ އަމިއްލަ އިހްތިޔާރުގައި ކަމަށާއި ފުރައިގެން ދާން ބޭނުންވާ ނަމަ މިހާރުވެސް އެކަން ފަހިކޮށްދޭނެ ކަމަށެވެ.

މިކަމާ ގުޅޭގޮތުން ވާހަކަ ދައްކަމުން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، އޭނާގެ ފުރުވާލުމަށް ކުރަމުންދާ މަސައްކަތް އެއްބާރުލުން ދީފައި ނުވާއިރު، ޕާސްޕޯޓް ވީތަންވެސް ސާފުކޮށްދީފައި ނުވާ ކަމަށެވެ.

ސީޕީ ވިދާޅުވީ، ޔާސިރު ޔަޙްޔާ ޞޯލިޙް އަކީ ޓެރަރިޒަމްގެ ބެކްރައުންޑް އޮތް މީހެއް ކަމަށާއި، ޔަމަނުގެ އިތުރުން އޮމާން އަދި ޕާކިސްތާނުގައި ޓެރަރިޒަމާ ގުޅުންހުރި މައްސަލަތަކުގައި އޭނާ ހައްޔަރުކޮށްފައިވާ ކަމަށެވެ. އެހެންކަމުން އޭނާ މުޖުތަމައަށް ދޫވެފައި ހުރުމަކީ ނުރައްކާތެރި ކަމެއް ކަމަށް ފުލުހުން އޭރު ވިދާޅުވިއެވެ.