ކޮވިޑް-19ގެ ނުރައްކާ ބޮޑުވެފައިވާތީ ރައްޔިތުންގެ މަޖިލީހުގެ ޖަލްސާތައް އޮންލައިންކޮށް ބޭއްވުމަށް ކުރީގެ ޑިފެންސް މިނިސްޓަރ އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ގޮވާލައްވައިފިއެވެ.
އާދަމް ޝަރީފް އުމަރު މިއަދު ކުރެއްވި ޓްވީޓެއްގައި ވިދާޅުވެފައި ވަނީ ކޮވިޑް-19 ކޮންޓްރޯލް ނުކުރެވި، މުޅި ރާއްޖެއަށް ފެތުރެމުންދާއިރު، މިދުވަސްވަރު މަޖިލިސް ޖަލްސާތައް އޮންލައިންކޮށް ބޭއްވުމަށް ގޮވާލާކަމަށެވެ.
ކޮވިޑް-19 އާއި ގުޅިގެން މީގެ ކުރިންވެސް ވަނީ މަޖިލީހުގެ ޖަލްސާތައް އޮންލައިންކޮށް ބާއްވާފައެވެ.
ރާއްޖޭގައި މިހާތަނަށް ކޮވިޑް-19 ޖެހިފައިވާ މީހުންގެ އަދަދު ވަނީ 4164 އަށް އަރާފައެވެ. އަދި މި ބަލީގައި މިހާތަނަށް 17 މީހަކު ނިޔާވައިވާއިރު، މި ބައްޔަށް ޕޮޒިޓިވް ވާ މީހުންގެ އަދަދު އަނެއްކާ ވަނީ އިތުރުވާން ފަށާފައެވެ. އަދި މާލޭގެ އިތުރުން އަތޮޅު ތެރޭގެ ބައެއް ރަށްރަށުންވެސް މީހުން ދަނީ މި ބައްޔަށް ޕޮޒިޓިވް ވަމުނެވެ.
Covid-19 control nukurevi, mulhi Raajje ah fethuremundhaairu, midhuvasvaru Majlis ge jalsaathah online koh beyvvumah govaalan.
— Adam Shareef Umar (@Adamshareefz) August 3, 2020
ބަލީގެ ނުރައްކާ ބޮޑުވެފައިވާއިރު މަޖިލިސް އިދާރާ އިންވެސް މީހުން ވަނީ މި ބައްޔަށް ޕޮޒިޓިވް ވެފައެވެ. ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވެފައި ވަނީ ކޮވިޑް19 ޖެހޭ މީހުން އިތުރުވަމުން އަންނަ ނަމަވެސް އިތުރު ފުރަބަންދަކަށް ދިއުމަކީ ރަނގަޅުކަމެއް ނޫންކަމަށެވެ.
މި ބަލި ކޮންޓްރޯލް ކުރުމަށް ޓަކައި ސަރުކާރުން ވަނީ ފިޔަވަޅުތަކެއް އަޅާފައެވެ. އެގޮތުން މާސްކް އެޅުން މަޖުބޫރު ކޮށްފައިވާއިރު، މި އަމުރާ ޚިލާފުވާ ފަރާތްތައް ދަނީ ޖޫރިމަނާ ކުރަމުންނެވެ.
