މާދަމާ ބޭއްވުމަށް ހަމަޖައްސައިފައިވާ ރައްޔިތުންގެ މަޖިލީހުގެ ޖަލްސާ އަންނަ ހަފްތާއަށް ފަސްކޮށްފައިވާ ކަމަށް ރައްޔިތުންގެ މަޖިލީހުން ބުނެފިއެވެ.
ރައްޔިތުންގެ މަޖިލީހުން މީޑިއާތަކަށް މައުލޫމާތު ދެމުން ބުނެފައިވަނީ މާދަމާ ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ 24 ވަނަ ޖަލްސާ އަންނަ ހަފްތާއަށް މިހާރު ފަސްކުރެވިފައިވާ ކަމަށެވެ.
މިހެންނަމަވެސް ކުރިއަށް އޮތް ތިން ދުވަހު މަޖިލީހުގެ ކޮމެޓީތަކުގެ މަސައްކަތް ކުރިއަށްދާނެ ކަމަށާއި އަދި މަޖިލީހުގެ އިދާރާވެސް ހުންނާނީ ހުޅުވައިފައި ކަމަށް މަޖިލީހުން މައުލޫމާތު ދެއެވެ.
"ކުރިއަށް އޮތް ތިން ދުވަހު އޮފީހަށް ނިކުންނާނީ ކޮމެޓީތަކުގެ މަސައްކަތް ކުރުމަށް ބޭނުންވާ މަދު އަދަދެއްގެ މުވައްޒަފުންނެވެ. އެހެން މުވައްޒަފުން ގޭގައި ތިބެގެން މަސައްކަތް ކުރުމަށް މަޖިލީހުގެ ރައީސްވަނީ އިރުޝާދު ދެއްވާފައެވެ." ރައްޔިތުންގެ މަޖިލީހުން މިރޭ ބުނެފައި ވެއެވެ.
މާދަމާ އޮންނަ ރައްޔިތުންގެ މަޖިލީހުގެ ޖަލްސާ ފަސްކޮށްފައިވާކަން އެ މަޖިލީހުން އަންގައިފައި މިވަނީ، ރާއްޖޭގައި ކޮވިޑް-19 ގެ ހާލަތު އިތުރަށް ގޯސްވެ، ދިވެހިންގެ ތެރޭގައި އެ ބަލި ފެތުރުން އާންމުވުމާ ގުޅިގެން، ކުރިއަށް އޮތް ތިން ދުވަހު ސަރުކާރުގެ އޮފީސްތައް ބަންދު ކުރަން ރައީސް އިބްރާހިމް މުހައްމަދު ސޯލިހު މިރޭ ނިންމަވައިފައި ވަނިކޮށެވެ.
