މިއަހަރުގެ ދެވަނަ ދައުރުގެ ޖަލްސާތައް ނިއްމާލާ މި މަހުގެ 27 ވަނަ ދުވަހު މަޖިލިސް ޗުއްޓީއަށް ދިއުމަށް ނިއްމައިފިއެވެ.
މުގައްރިރުންގެ ކޮމެޓީތަކުގައި ވަރަށް ގިނަ މަސައްކަތް އެބަހުރި ކަމަށާއި، މި ދައުރު ނިމުމުގެ ކުރިން ކޮމެޓީތަކުގެ މަސައްކަތް އަވަސްކޮށްދިނުމަށް އެދިވަޑައިގެން މިއަދު ބޭއްވި މަޖިލިސް ޖަލްސާގައި ވާހަކަފުޅުދައްކަވަމުން މަޖިލިސްގެ ރައީސް މުހައްމަދު ނަޝީދު ވިދާޅުވީ، މި މަހުގެ އެންމެ ފަހު ބުރާސްފަތި ދުވަސް، އޮގަސްޓް 27 ގައި މަޖިލިސް ޗުއްޓީ އަށް ދާނެ ކަމަށެވެ.
މަޖިލީހުގެ ޗުއްޓީގެ ކަންކަން ރޭވިފައި އޮންނަ ގޮތް ބައެއް ބޭފުޅުންނަށް އޮޅުން އަރާފައި އޮންނަ ކަމަށް ވިދާޅުވެ، ނަޝީދު އިތުރަށް ވިދާޅުވީ، ރައީސް މަޖިލީސް ހިނގާގޮތް ލިޔެފައި އޮންނަނީ ޤާނޫނު އަސާސީގައި ކަމަށާއި، މަޖިލީސްގެ ޤާނޫން އަސާސީގައި، މަޖިލިސް ތިން ދައުރަކަށް ބެހިގެންދާންޖެހޭނެ ކަމަށް އޮންނަ ކަމަށެވެ. އަދި މި ތިން ދައުރު ފަށާގޮތާއި ނިމޭގޮތް ޤަވާއިދުގައި އޮންނަ ކަމަށް ނަޝީދު ވިދާޅުވިއެވެ.
އެނޫންގޮތަކަށް މިވަގުތު މަޖިލީހުގެ ކަންކަން ކުރިއަށް ގެންދިއުމަކީ ހަމަޖެހިފައިވާ ނިޒާމެއް ނޫންކަމަށާއި، އެހެންކަމުން، މި މަހުގެ 27 ވަނަ ދުވަހު މަޖިލީސް ޗުއްޓީއަށް ދޭނެ ކަމަށް ނަޝީދުގެ ވާހަކަފުޅުގައި ވިދާޅުވިއެވެ.
