ހައުސިންގ އެންޑް އިންފްރާސްޓްރަކްޗަރގެ މިނިސްޓަރ މުޙައްމަދު އަސްލަމްއަށް އެބޭފުޅާގެ އަމިއްލަ ޕާޓީ އެމްޑީޕީއިންވެސް ބަލައިނުގަންނަ މިންވަރު މަޖިލީހުގެތެރެއިން ފެންނަމުންދާކަމަށް ކާށިދޫ ދާއިރާގެ މެންބަރު އަބްދުﷲ ޖާބިރު ވިދާޅުވެއްޖެއެވެ.
ޖާބިރު މިހެން ވިދާޅުވީ މިއަދުގެ ރައްޔިތުން މަޖިލީހުގެ ޖަލްސާގައި ވާހަކަފުޅުދައްކަވަމުންނެވެ.
މިނިސްޓަރ އަސްލަމް މިއަދުގެ ޖަލްސާއަށް ހާޒިރައްވާފައިވަނީ ފުވައްމުލަކު އުތުރު ދާއިރާގެ މެންބަރު މުޙައްމަދު ރަޝީދު އާއި ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދު ކުރުމަށް ހުށަހަޅައިފައިވާ ސުވާލަކާއި ގުޅިގެންނެވެ.
މިނިސްޓަރާއި ސުވާލުކުރެއްވުމަށް ލިބުނު ފުރުސަތުގައި، ޖާބިރުގެ ވާހަކަފުޅު ފައްޓަވަމުން ވިދާޅުވީ، މަޖިލޫހުން، ފެންނަމުން މިދަނީ ޕަޓީ ތެރޭގައި ކޯޅުން އޮތް މިންވަރުކަމަށާއި، އެމްޑީޕީން އަސްލަމް ޤަބޫލުނުކުރައްވާ މިންވަރަށްވެސް ވާހަކަފުޅުތައް ދައްކަވަމުންދާތައް އެބަފެނިވަޑައިގަންނަވާކަމަށެވެ.
މިއަދުގެ ޖަލްސާގައި މެންބަރުން ކުރެއްވި ސުވާލަތަކަށް އަސްލަމް ޖަވާބުދެއްވި ގޮތާއިމެދު، މަޖިލީހުގެ ރައީސް މުހައްމަދު ނަޝީދު ހިތްހަމަނުޖެހުން ފާޅުކޮށްފައިވެއެވެ.
އެގޮތުން ގުޅިފަޅުން ހިއްކާ ބިމުގެ ސަރަހައްދުގެ ޕްލޭންއާ ގުޅޭ ގޮތުންނާއި އެ ސަރަހައްދުގައި މާލެ ރައްޔިތުންނާއި މާލޭގައި ދިރިއުޅޭ ރައްޔިތުންނަށް ހާއްސަ ކުރެވޭ ބޯހިޔާވަހިކަމުގެ މަޝްރޫއު ޕްލޭންއާ ގުޅޭ ގޮތުން، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) ސުވާލު ކުރެއްވުމާއި ގުޅިގެން، މިނިސްޓަރު އަސްލަމް ވިދާޅުވީ، ގުޅިފަޅުގެ ޕްލޭން، ޑްރާފްޓެއް އެކުލެވިފައިވާ ކަމަށާއި، އެކަމާއި ގުޅޭ ގޮތުން ސިޓީ ކައުންސިލާއި މަޖިލީހުގައި ތިއްބަވާ މާލެ ދާއިރާތަކުގެ މެންބަރުންނާ އެކު ބައްދަލުވުމެއް ބާއްވަން މަސައްކަތް ކުރެވެމުންދާ ކަމަށެވެ.
މިނިސްޓަރުގެ ވާހަކަ އެހާ ހިސާބުން މެދުކަނޑާލެއްވުމަށް ފަހު، ރައީސް ނަޝީދު ވިދާޅުވީ، މެންބަރު އެކުރައްވަނީ ރާއްޖޭގެ ގިނަ ރައްޔިތުންތަކެއް ބޭނުންވާ ޖަވާބެއް ކަމަށް ބުނެ ހިތްހަމަނުޖެހުން ފާޅުކޮށްފައިވެއެވެ. އެގޮތުން ޕްލޭންއެއް އޮތުމަކީ، އެ ޕްލޭން ގެޒެޓް ކޮށްފައި އޮތުން ކަމަށް ނަޝީދު ވިދާޅުވިއެވެ.
މިއަދުގެ ޖަލްސާގައި ފުވައްމުލަކު ގިރާ ސަރަޙައްދު ޙިމާޔަތްކުރުމަށް މިހާތަނަށް ސަރުކާރުން ކުރައްވާފައިވާ މަސައްކަތަކީކޮބައިތޯ އާއި މި މަޝްރޫޢުގެ ޢަމަލީ މަސައްކަތް ނުފެށި ލަސްވަނީ ކީއްވެގެންތޯ، އަދި މި މަޝްރޫޢުގެ ޢަމަލީ މަސައްކަތް ފެށޭނެކަމަށް ލަފާކުރެވޭ ތާރީޚަކީ ކޮބައިކަން ބެހޭގޮތުން ސުވާލުތައް ކޮށްފައިވެއެވެ.
