ރައްޔިތުން މިހާ ނިކަމެތިކޮށް ތިބި ވަގުތެއްގައި މާސްކް ނޭޅުމުން ޖޫރިމަނާ ކުރައްވަން ވާނީ ހިލޭ މާސްކް ދިނުމަށް ފަހު ކަމަށް ކާށިދޫ ދާއިރާގެ މެންބަރު އަބްދުﷲ ޖާބިރު ވިދާޅުވެއްޖެއެވެ.
އަބްދުﷲ ޖާބިރު ރައްޔިތުން މަޖިލީހުގެ މިއަދުގެ ޖަލްސާގައ،ި ހެލްތު މިނިސްޓަރު އަބްދުﷲ އަމީން އާ ސުވާލު ކުރައްވަމުން ވިދާޅުވެފައިވަނީ މާސްކް އަޅަން އަމުރުކެރެއްވި އިރު ހިލޭ މާސް ނުލިބޭ ގޮތައް އަމުރުކޮށްފައި މާސްކް ނޭޅުމުން ޖޫރިމަނާއެއް އަންނަނީ ކީއްވެގެންތޯއާއި ރައްޔިތުން މިހާ ނިކަމެތިކޮށް ތިބި ވަގުތެއްގައި މާސްކް ނޭޅުމުން ޖޫރިމަނާ ކުރައްވަން ވާނީ ހިލޭ މާސްކް ދިނުމަށް ފަހު ކަމަށެވެ.
މި ސުވާލަށް ޖަވާބު ދެއްވަމުން އަމީން ވިދާޅުވެފައިވަނީ ކޮންމެ ޖޫރިމަނާއެއްގެ ފަހަތުގައި އޮންނަނީ ހިލޭ ހިދުމަތެއް ނޫން ކަމަށާއި ސައިކަލު ނުބައި ތަނެއްގައި ޕާކް ކުރުމުން ޖޫރިމަނާ ކުރެވޭ ކަމަށާއި އަދި އެހެން ނުބައި ކަންކަމުގައި އުޅުމުން ޖޫރިމަނާ ކޮށް އަދަބު ދެވޭ ހާލަތްތައް އަންނަ ކަމަށެވެ.
އަދި މާސްކް ނޭޅުމުން ޖޫރިމަނާ ކުރުމަށް ނިންމީ މާސްކް ނޭޅުމުން ހަމައެކަނި އޭނާ އަށް ގެއްލުން ލިބޭތީ ނޫން ކަމަށާއި އޭނާގެ ވަށައިގެން ތިބި މީހުންނަށް ވެސް އެކަމުގެ ސަބަބުން ގެއްލުން ލިބޭ ކަމަށާއި ކަމެއް ނޫން ކަމަށް ހީކޮށް ދޫކޮށްލެވޭ ކަމަކުން އަޅުގަނޑުމެންގެ އެތައް ބައެއް މިކަމަށް ހުށަހެޅިގެން ދާ ކަމަށް އަމީން ވިދާޅުވިއެވެ. އަދި އަމީން ވިދާޅުވީ މާސްކް އެޅުން މަޖުބޫރު ކުރީ އަޅުގަނޑުމެން އިތުރު ލޮކްޑައުން އަކަށް ދާން ބޭނުން ނުވާތީ ކަމަށާއި އަޅުގަނޑުމެން ރާއްޖޭގެ ބޯޑަރު އިތުރަށް ބަންދު ކުރަން ބޭނުން ނުވާތީ ކަމަށާއި ރާއްޖޭގެ އެހެން ރަށްރަށަށް އެއްފަހަރާ ކޮވިޑް-19 ފެތުރެން ބޭނުން ނުވާތީ ކަމަށެވެ.
އިތުރަށް ވާހަކަ ދައްކަވަމުން އަމީން ވިދާޅުވީ ފުރަތަމަ ކޮޅު މާސްކް އެޅުން ރަނގަޅު ކަމަށް ފާހަގަ ކުރެވުން ނަމަވެސް މާސްކް ނާޅާ މީހުން އިތުރު ވަމުން ދިއުމާއި ބަލި ޖެހޭ މީހުން އިތުރު ވަމުންދާތީ މާސްކް އެޅުން މަޖުބޫރު ކުރީ ކަމަށެވެ.
ހެލްތު މިނިސްޓަރު އަބްދުﷲ އަމީން ގެ ވާހަކަ އަށްފަހު ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވީ ބޮޑު ބިރުވެރިކަމެއް ކޮވިޑް-19 ގެ ބަލިމަޑުކަމުގެ ސަބަބުން އެފެދިފައިވާ ކަމަށާއި މި ބިރުވެރިކަމުގެ ސަބަބުން ރާއްޖޭގެ ރަށްރަށަށް މީހުންނަށް އަރާ ފެބުމަށް ދަތިވާކަމަށާއި ކައުންސިލް ތަކުން ދެކޭ ގޮތްތައް ތަފާތުވާ ކަމަށާއި އެއްބަޔަކާއި އަނެއްބަޔަކާއި އެކީ އުޅޭގޮތްވެސް ތަފާތުވާ ކަމަށެވެ.
