އަންނަ އަންގާރަ ދުވަހު ހުވާކުރާ 19 ވަނަ ރައްޔިތުންގެ މަޖިލިހުގެ ރައީސަކަށް އެންމެ އެކަށީގެންވަނީ ވިލުފުށީ ދާއިރާގެ އިންތިޚާބީ މެމްބަރު ހަސަން އަފީފް ކަމަށް ރައީސް އިބްރާހިމް މުހައްމަދު ސޯލިހް ރޭ ވިދާޅުވި ނަމަވެސް އެ މަގާމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ގެނައުމަށް ރައީސްގެ އިތުބާރާއި ތާއީދު އަދިވެސް އެބައޮތް ކަމަށް އަސްލަމް މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގައި ރޭ އޮތް ތަރާވީހަކަށް ފަހު ނޫސްވެރިންގެ ސުވާލުތަކަށް ޖަވާބު ދެއްވަމުން ރައީސް ޞޯލިޙް ވިދާޅުވީ، އެމަނިކުފާނުގެ މަގާމުގެ ހައިސިއްޔަތުން ވަކި ބޭފުޅެއްގެ ނަން ވިދާޅުވުން އެހާ ރަނގަޅެއް ނޫން ކަމަށާއި، ނަމަވެސް ރައްޔިތުންގެ މަޖިލީހުގެ ރައީސްކަމަށް އެންމެ އެކަށީގެންވަނީ ކުރީގެ ހޯމް މިނިސްޓަރު އަދި ވިލުފުށީ ދާއިރާގެ އިންތިޚާބީ މެންބަރު ހަސަން އަފީފް ކަމަށެވެ.

ރައީސްގެ އެ ނިންމެވުމާ ގުޅިގެން، މީޑިއާއިން ދެންނެވި ސުވާލަކަށް ޖަވާބުދެއްވަމުން އަސްލަމް މިއަދު ވިދާޅުވީ، މަޖިލިހުގެ ރައީސް ކަމަށް އަފީފަކީ ގާބިލް ބޭފުޅެއް ކަމަށް ރައީސް ވިދާޅުވީ ނޫސްވެރިޔާ ސުވާލު ކުރެއްވި ގޮތުން ކަމަށާއި، ރައީސް އިބްރާހިމް މުހައްމަދު ސޯލިހް ވަކި ބޭފުޅަކަށް ތާއީދު ކުރައްވާ ކަން މިހާތަނަށް އައި އިރު، ހާމަކުރައްވާފައި ނުވާ ކަމަށެވެ.

އަސްލަމް ވިދާޅުވީ، ރައީސް ޞޯލިޙް އާ ރޭ ވެސް ބައްދަލުވެ، ގަޑިއިރެއްހާ އިރު ވަންދެން މަޝްވަރާ ކުރެއްވި ކަމަށާއި، ވަކި ބޭފުޅަކަށް ތާއީދު ނުކުރައްވާކަމަށް އަސްލަމް އަރިހުގައި ރައީސް ވިދާޅުވި ކަމަށެވެ.

"އަޅުގަނޑު މިހުރީ ކޮންމެ ބޭފުޅަކު ހޮވުނަސް އެބޭފުޅަކަށް ތާއީދު ކުރާ ގޮތަށް. އަޅުގަނޑަށް ވުރެ ރަނގަޅު ބޭފުޅެއް ނެތް ކުރިމަތިލާފައި މަޖިލިހުގެ ރައީސް ކަމަށް،""މިހާރު" ނޫހަށް އަސްލަމް ވިދާޅުވެފައިވެއެވެ.

ރައީސްގެ ވާހަކަފުޅު ވަކި ގޮތަކަށް އައި ކަމުގައި ވިޔަސް، މަޖިލިހުގެ ރައީސްކަމަށް ވާދަ ނުކުރެއްވުމުގެ ވިސްނުމެއް ނުގެންގުޅުއްވާ ކަމަށެވެ. އަދި މަޖިލިހުގެ ރައީސް ކަމަށް ވަޑައިގަތުމުގެ ޝައުގުވެރިކަން އަދިވެސް އެބަހުރި ކަމަށާއި އެ މަގާމަށް ވާދަކުރައްވާނެ ކަމަށް އަސްލަމް ވިދާޅުވިއެވެ.

މަޖިލިހުގެ ރައީސް ކަމަށް އެމްޑީޕީގެ ފަރާތުން މިހާތަނަށް ޝައުގުވެރިކަން ފާޅުކުރައްވާފައި ވަނީ އަސްލަމާއި އަފީފްގެ އިތުރުން މެދު ހެންވޭރު ދާއިރާގެ މެމްބަރު އަލީ އާޒިމާއި މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ)ގެ އިތުރުން މީދޫ ދާއިރާގެ މެމްބަރު ރޮޒައިނާ އާދަމެވެ. އޭގެ ތެރެއިން އެމްޑީޕީގެ ތެރޭގައި އެންމެ ބޮޑު ވާދަވެރިކަމެއް އުފެދިފައި އޮތީ އަސްލަމާއި އަފީފްގެ މެދުގަ އެވެ.