މަޝްހޫރު ލަވަކިޔުންތެރިޔާ، ސެލީނާ ގޮމޭޒް އެމެރިކާގެ ރިޔާސީ އިންތިހާބުގައި ފުރަތަމަ ފަހަރަށް ވޯޓު ލީކަން އޭނާ ހާމަކޮށްފިއެވެ. ސެލީނާ ބުނިގޮތުގައި، މިއީ އޭނާ ވޯޓެއް ލީ ފުރަތަމަ ފަހަރެވެ.
ސެލީނާ ވޯޓު ލާފައިވަނީ، މިހާރު ކުރިއަށްދާ އެމެރިކާގެ ރިޔާސީ އިންތިހާބުގެ "އާލީ ވޯޓިން" ނުވަތަ ކުރިން ވޯޓު ލުމުގެ މަރުހަލާގައެވެ.
ސެލީނާ ބުނި ގޮތުގައި، މީގެ ކުރިން ވޯޓުލާން ދިއުމަށް އޭނާ ދުވަހަކުވެސް ހިތަށް ނާރާކަމަށެވެ. އެގޮތުން އޭނަގެ ވޯޓުން ނުވަތަ އެންމެ ވޯޓަކުން އިންތިހާބުގެ ނަތީޖާއަށް މާ ބޮޑު ބަދަލެއް ނާންނާނެކަމަށް ކުރިން ހީކުރެވުނު ކަމަށް ސެލީނާ ބުންޏެވެ. ނަމަވެސް އެވިސްނުން މިފަހަރު ބަދަލުވެ، ވޯޓު ލާން ނިންމީކަމަށް ސެލީނާ ބުނެފައިވެއެވެ.
ސެލީނާ ބުނީ، ވޯޓު ލުމުގެ މުހިއްމުކަން ވިސްނިއްޖެކަމަށާއި، އަދި ކުރިއަށް އޮތްތަނުގައި އޭނާގެ މަޤުސަދަކީ ވޯޓުލުމުގެ މުހިއްމުކަން އެހެން މީހުންނަށްވެސް ވިސްނައިދިނުން ކަމަށެވެ.
އެމެރިކާގެ ރިޔާސީ އިންތިހާބް އޮންނާނީ ނޮވެމްބަރުމަހު ތިން ވަނަ ދުވަހުއެވެ. އަދި މިފަހަރު އެމެރިކާގެ ރައީސްއާ ދެކޮޅަށް ޑިމޮކްރެޓިކް ޕާޓީން ނުކުމެވަޑައިގެންނަވަނަނީ އެމެރިކާގެ ކުރީގެ ނާއިބު ރައީސް ޖޯ ބައިޑެންއެވެ.
