ދައުރުން ބޭރުން މިމަހު 13 ގައި ރައްޔިތުން މަޖިލީހުގެ ޖަލްސާއެއް ބާއްވަން އެޖެންޑާކޮށްފިއެވެ.
ޖަލްސާ ބާއްވަން އެޖެންޑާ ކޮށްފައިވަނީ މިމަހު 13 ވަނަ ދުވަހުގެ ރޭ 08:30 ގައެވެ.
އެ ޖަލްސާގައި އޮންނާނީ ސަރުކާރުގެ ފަރާތުން، ހުޅުމާލޭ ދާއިރާގެ މެމްބަރު އަލީ ނިޔާޒު ހުށަހަޅުއްވާފައިވާ ލޯކަލް ކައުންސިލް އިންތިހާބުގެ ހާއްސަ ގާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން ކަމަށް އެޖެންޑާ ގައި ވަނީ ބުނެފަ އެވެ.
ދައުރުން ބޭރުން ޖަލްސާ ބާއްވަން އެޖެންޑާ ކޮށްފައިމިވަނީ، ކޮވިޑް-19 އާ ގުޅިގެން އިއުލާނު ކޮށްފައިވާ އާންމު ސިއްހަތުގެ ކުއްލި ނުރައްކަލުގެ ހާލަތު އުވާނުލި ނަމަވެސް، ފަސްކޮށްފައިވާ ލޯކަލް ކައުންސިލް އިންތިހާބު ބޭއްވޭ ގޮތަށް ގާނޫނަށް އިސްލާހުގެނައުމަށް ރައްޔިތުންގެ މަޖިލީހަށް ހުށަހަޅައި، ދައުރުން ބޭރުގައި ޖަލްސާއެއް ބާއްވައިގެން އެ އިސްލާހު ގެނައުމަށް އެދިފައިވަނިކޮށެވެ.
ބަންޑާރަ ނައިބުގެ އޮފީހުން ބިލް އެކުލަވާލުމުގެ މަސައްކަތް އިއްޔެ ފަށާފައިވާއިރު އެ ބިލް މަސައްކަތް ނިންމުމަށް ފަހު ސަރުކާރުގެ ފަރާތުން ރައްޔިތުންގެ މަޖިލީހަށް އެ ބިލް ހުށަހަޅުއްވާފައިވަނީ ރައްޔިތުންގެ މަޖިލީހުގެ ހުޅުމާލެ ދާއިރާގެ މެންބަރު އަލީ ނިޔާޒެވެ.
މިދިޔަ އަހަރު އޭޕްރީލް މަހު ބާއްވުމަށް ހަމަޖެހުނު ލޯކަލް ކައުންސިލް އިންތިހާބު ބޭއްވިފައި ނުވަނީ ކޮވިޑް-19 އާއި ގުޅިގެންނެވެ.
އެއަށްފަހު ދެން އިންތިޙާބު ބާއްވަން އުޅުނީ އަންނަ މާޗް މަހުުގެ ހަ ވަނަ ދުވަހުއެވެ. ނަމަވެސް މާރޗް 6 ގައި އިންތިޚާބު ނުބޭއްވޭނެކަން އީސީން ހާމަކޮށްފައިވާއިރު، ލޯކަލް ކައުންސިލް އިންތިހާބު އަންނަ އެޕްރީލް ތިނެއްގައި ބޭއްވުމަށް ތަވާލުކުރުމަށް އިލެކްޝަން ކޮމިޝަނުން (އީސީ) އިން ނިންމާފައިވާކަން ހާމަކޮށްފައިވަނީ އިއްޔެއެވެ.
ލޯކަލް ކައުންސިލު އިންތިހާބު ނުބޭއްވި ލަސްވަމުން ދާތީ އިންތިހާބު ބޭއްވޭނޭ ގޮތް ހެދުމަށް ގާނޫނަށް ހުށަހަޅާފައިވާ އިސްލާހު ތަކުގެ މަސައްކަތް ކުރުމަށް ދައުރުން ބޭރުން މަޖިލީހުގެ ޖަލްސާއެއް އެޖެންޑާކޮށްފައިމިވަނީ އިންތިޚާބު ލަސްކުރުމާއި ގުޅިގެން އިދިކޮޅުގެ ގިނަ ފަރާތްތަކެއްގެ ފާޑުކިއުންތައް އަމާޒުވެފައިވަނިކޮށެވެ.
