ސިއްހީ ކުއްލި ނުރައްކަލުގެ މި ހާލަތުގައި އިންތިހާބު ބޭއްވުމަކީ ވަކިން ހަރަދު ބޮޑުވާނެ ކަމެއް ކަމަށް ރައްޔިތުންގެ މަޖިލީހުގެ ހޯރަފުށީ ދާއިރާގެ އެމްޑީޕީ މެމްބަރު އަހްމަދު ސަލީމް ވިދާޅުވެއްޖެއެވެ.
ކުރިއަށް އޮތް ލޯކަލް ކައުންސުލް އިންތިހާބު ވީހާވެސް އަވަހަކަށް ބޭއްވުމަށް "ކައުންސިލް އިންތިހާބުގެ ހާއްސަ ގާނޫނަށް އިސްލާހު ގެނައުމުގެ ބިލަށް މިއަދު މަޖިލީހުގެ ޖަލްސާގައި ބަހުސްކުރައްވަމުން ސަލީމް ވިދާޅުވީ، އިންތިހާބެއް ބޭއްވުމަކީ ވަރަށް ހަރަދު ބޮޑު ކަމެއް ކަމަށެވެ.
ވޯޓުލާ މަރުކަޒުތައް ޑިސްއިންފެކްޓް ކުރަން ޖެހޭ ކަމަށާއި، އެކަމަށް އެކަނިވެސް 3.5 މިލިއަން ރުފިޔާ ދާނެ ކަން ފާހަގަކުރައްވަމުން ސަލީމް ވިދާޅުވީ، ކޮންމެ ކިއުއެއްގައި [ވޯޓުލާން އަންނަ މީހުންގެ] ފިނި ހޫނު މިން ބެލުމަށް، ތާމޯމީޓަރަށް އެކަނި 1.2 މިލިއަން ރުފިޔާ ހަރަދުވާނެ ކަމަށް ލަފާ ކުރެވޭ ކަމަށެވެ.
މީގެ އިތުރުން ސަލީމް ވަނީ 600 އޮފިޝަލުން މަސައްކަތް ކުރާނެ ކަން ފާހަގަކުރައްވާ، އެއިން ކޮންމެ މީހެއްގެ ޕާސަނަލް ޕްރޮޓެކްޓް އިކުޕްމެންޓް (ޕީޕީއީ)އަށް ތިން މިލިއަން ރުފިޔާ ހަރަދުވާނެ ކަމަށްވެސް ވިދާޅުވެފައެވެ.
އިންތިހާބުގެ ގާނޫނަށް އިސްލާހު ގެންނަ ބިލަށް ބަހުސް ކުރައްވަމުން ސަލީމް ވަނީ، ވޯޓުލާ މަރުކަޒުގެ އޮފިޝަލުންނާއި، އީސީގެ ރައީސް ޕޮޒިޓިވްވެ ދެން ތިއްބެވި މެމްބަރުންވެސް ކަރަންޓީނަށް ދާން ޖެހިއްޖެނަމަ ދެން ވާނީ ކިހެނެއްތޯއާމެދު ސުވާލު އުފައްދަވައިފައެވެ.
