ހަރުކަށި ފިކުރު ފަތުރާ މީހުންނަށް އިސްލާމްދީނުގެ ޞައްޙަ ޢަޤީދާ ހާމަކޮށްދިނުމަށް މި އަހަރު "ނޭޝަނަލް މޮޑެރޭޝަން ކެމްޕެއިން" ފަށާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހު މިފަދައިން ވިދާޅުވީ، ރައްޔިތުންގެ މަޖިލީހުގެ 2022 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާގައި މިއަދު އިއްވެވި ރިޔާސީ ބަޔާނުގައެވެ.
ރައީސް ވިދާޅުވީ، ދީނުގެ ނަމުގައާއި، ދީނާ ދެކޮޅަށް ހަރުކަށި ފިކުރު ފަތުރާ، މީހުންގެ ފުރާނައާއި މުދަލަށް ގެއްލުންދޭ މީހުންނަށް، އިސްލާމްދީނުގެ ޞައްޙަ ޢަޤީދާ ހާމަކޮށްދިނުމުގައި، ދީނީ ޢިލްމުވެރިންގެ އެހީގައި މި އަހަރު "ނޭޝަނަލް މޮޑެރޭޝަން ކެމްޕެއިން" ކުރިއަށް ގެންދެވޭނެ ކަމަށެވެ.
އިމާމުންނާއި މުދިމުންނަށް އިސްލާމީ ތަޢުލީމުގެ ރޮނގުން ޑިގްރީ ހޯދައިދިނުމަށް 290 މީހުން ދަނީ ތަޢުލީމީ މަރުޙަލާ ފުރިހަމަކުރަމުން ކަމަށާއި ޤުރްއާން މުދައްރިސުން ބިނާކުރުމަށް މިދިޔަ އަހަރު 1,599 މީހުން ވަނީ ތަމްރީނުކޮށް ނިމިފައި ކަމަށްވެސް ރައީސް ޞާލިހު ވިދާޅުވިއެވެ.
"ދިވެހި ޤައުމިއްޔަތު ބިނާވެ، ދިރިދެމިއޮންނަންޖެހޭ ބަހާތަކުގެ މައްޗަށް ތާއަބަދުމެ ސަރުކާރު މިއޮތީ ސަމާލުވެ ހޭލާ. މާތްވެގެންވާ އިސްލާމްދީނާއި، ދިވެހިރާއްޖޭގެ މިނިވަންކަމާއި، ސިޔާދަތާއި އިސްތިޤްލާލަށް ބުރުލެއް އަދި ގުޑުމެއް އައުމަށް ސަރުކާރުން ކުޑަވެސް ފުރުޞަތެއް ނުދޭނެ. ދިވެހިންގެ އަމާން ޞުލްޙަވެރި ދިރިއުޅުމުގެ މައްޗަށް ނާމާންކަމާއި، ހަތުރުވެރިކަމާއި، ޢަދާވާތްތެރިކަމަކަށް ވެރިވެއެއްނުގަނެވޭނެ." ރިޔާސީ ބަޔާން އިއްވަވަމުން ރައީސް ވިދާޅުވިއެވެ.
މީގެ އިތުރުން ވިދާޅުވީ، މިދިޔަ އަހަރު ސަރުކާރުން އެންމެ އިސްކަންދިން ސިޔާސަތަކީ މާތްވެގެންވާ އިސްލާމްދީނުގެ ޞައްޙަ މަޢުލޫމާތު ދިވެހިންގެ ހިތްތަކުގައި އަށަގެންނެވުންމާއި އިސްލާމީ ރިވެތި އަދަބު އަޚްލާޤުގެ މަތީގައި ދަރިން ތަރުބިއްޔަތުކޮށް ބޮޑެތިކުރުން ކަމަށެވެ.
