ރާއްޖޭގައި ހުރި އެންމެ ބޮޑު ހޮސްޕިޓަލް، ހުޅުމާލެ ޓްރީޓޮޕް ހޮސްޕިޓަލްގެ ކެންޓީނުން ކައިގެން، ކާނާވިހަވި ބައެއް މީހުން ނުރައްކާތެރި ބައްޔެއް ކަމަށްވާ ނިއުމޯނިއާއަށް ޕޮޒިޓިވްވެ ފަރުވާދެމުންދާކަން އެނގިއްޖެއެވެ.

މިނޫހަށް ކަށަވަރު ކުރެވިފައިވާ ގޮތުގައި މިދިޔަ މަހުގެ 28 ވަނަ ދުވަހު އެ ހޮސްޕިޓަލްގެ ކެންޓީނުން ކައިގެން ކާނާވިހަވެގެން 29 މީހަކު އެޑްމިޓްކޮށް ދެމީހަކަށް އައިސީޔޫގައި ފަރުވާދީފައިވެއެވެ. ނަމަވެސް އޭގެ ތެރެއިން މިހާރު ހޮސްޕިޓަލްގައި އެޑްމިޓްކޮށް ފަރުވާދެމުން ދަނީ ހަތަރު މީހުންނަށެވެ.

މި ނޫހަށް ކަށަވަރު ކުރެވިފައިވާ ގޮތުގައި ކާނާވި ވިހަވި މީހުންގެ ތެރެއިން މިވަގުތު ހޮސްޕިޓަލްގައި އެޑްމިޓްކޮށް ފަރުވާދެމުންދަނީ އެ ހޮސްޕިޓަލްގައި މަސައްކަތްކުރާ ދިވެހި އަންހެން މުވައްޒަފަކަށާއި، އިންޑިއާގެ ފިރިހެނެއްގެ އިތުރުން ފިލިޕިންސްގެ އަންހެނަކަށާއި، އޭނާގެ 3 އަހަރުގެ އަންހެން ދަރިފުޅަށެވެ.

މިކަމާ ގުޅިގެން މިނޫހުން ކުރި ސުވާލަކަށް ޖަވާބުދެއްވަމުން ޓްރީޓޮޕް ހޮސްޕިޓަލްގެ މީޑިއާ އޮފިޝަލް ވިދާޅުވީ، މިވަގުތު ފަރުވާދެމުންދަނީ ދެ މީހުންނަށް ކަމަށެވެ. ނަމަވެސް ހަތަރު މީހަކަށް ފަރުވާދެމުންދާކަން މިނޫހަށް އެނގޭކަމަށް ދެންނެވުމުން މީޑިއާ އޮފިޝަލް ފަހުން ވިދާޅުވީ، ދިވެހިންނާއި ބޭރު މީހުން ހިމެނޭހެން ތިން މީހުންނަށް ފަރުވާދެމުންދާ ކަމަށެވެ.

އިތުބާރުހިފޭ މަސްދަރަކުން މިނޫހަށް ބުނީ، މިވަގުތު އެ ހޮސްޕިޓަލްގައި ފަރުވާދެމުންދާ ފިލިޕިންސް އަންހެން މީހާއާއި، އޭނާގެ ތިން އަހަރުގެ ތުއްތު އަންހެން ދަރިފުޅަށް އިންފެކްޝަންގެ ސަބަބުން ނިއުމޯނިޔާ ޖެހިފައިވާ ކަމަށެވެ.

ޓްރީޓޮޕް ހޮސްޕިޓަލްގައި ކާނާވިހަވުމުގެ ހާދިސާއެއް ހިނގާފައިވާކަން މިދިޔަ ހުކުރު ދުވަހު ހެލްތު މިނިސްޓްރީންވެސް ވަނީ މިނޫހަށް ކަށަވަރުކޮށްދެއްވާފައެވެ.