މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށުގައި ތިބި ޤައިދީންނަށް އަމާޒުކޮށްގެން އައްސޭރިޖަލުގައި ސެޓްފިކެޓް 3 އިން އިލެކްޓްރީޝަން ކޯހެއް ފަށައިފި އެވެ.
މި ކޯހަކީ ކަރެކްޝަނަލް ސަރވިސްގެ ގެ ބެލުމުގެ ދަށުގައި ތިބި ޤައިދީން ރިހިބެލިޓޭޓްކޮށް އަނބުރާ މުޖުތަމައަށް ގެނައުމަށް އެ ސަރވިސް އިން ކުރަމުން ގެންދާ މަސައްކަތްތަކުގެ ތެރެއިން ހިންގޭ ކޯހެއްކަމުގައި އެފަރާތުން ވަނީ ވިދާޅުވެފައެވެ. އަދި އެ ސަރވިސް އިން ހިންގާ މިފަދަ ކޯސްތަކަކީ މޯލްޑިވްސް ކޮލިފިކޭޝަން އޮތޯރިޓީ އިން ޤަބޫލު ކުރާ ފެންވަރަށް ކުރިއަށް ގެންދާ ޕްރޮގްރާމްތަކެކެވެ. މިފަދަ ކޯސްތައް ހިންގުމުގެ މަޤްޞަދަކީ، މި ކޯސް ފުރިހަމަ ކުރާ ކޮންމެ ޤައިދީއަކު ވެސް އަނބުރާ މުޖުތަމަޢަށް ނުކުންނަ އިރު ވަޒީފާގެ މައިދާނަށް އަހުލުވެރިކުރުވާ، އެމީހުންނަކީ ވެސް މުޖުތަމަޢުއަށް ފައިދާ ކުރުވަނިވި، ބޭނުންތެރި ބަޔަކަށް ހެދުންކަމުގައި އެފަރާތުން ވަނީ ވިދާޅުވެފައެވެ.
ކޯސް ފެށުމުގެ ގޮތުން ބޭއްވި ރަސްމިއްޔާތު ޝަރަފްވެރިކޮށްދެއްވީ މިނިސްޓްރީ އޮފް ހަޔާ އެޑިއުކޭޝަންސްގެ ސްޓޭޓް މިނިސްޓަރ މުޙައްމަދު ހާޝިމް އެވެ. މިރަސްމިއްޔާތުގައި ޑެޕިޔުޓީ ކޮމިޝަނަރ އޮފް ޕްރިޒަންސް އުސްތާޒް އިބްރާހިމް މުޙައްމަދު ދީދީއާއި، ކޮމިޝަންޑް އޮފިސަރުން ވަނީ ބައިވެރިވެވަޑައިގެންފައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ސްޓޭޓް މިނިސްޓަރ މުޙައްމަދު ހާޝިމް ވިދާޅުވީ، މި ކޯސް ފުރިހަމަ ކުރާ ކޮންމެ ބައިވެރިޔަކަށް ވެސް ރާއްޖޭގެ އެނާޖީ އޮތޯރިޓީ އިން ދޫކުރާ ޚާއްޞަ ލައިސެންސެއް ލިބޭނެކަމަށެވެ. އަދި މި ލައިސަންސް ލިބޭ އެއްވެސް ފަރާތަކުން ގެޔެއް ވައިރުކުރުމަށް އެހެން މީހެއްގެ ސޮއި ހޯދަން ދާން ނުޖެހޭނެ ކަމަށް ވެސް ހާޝިމް ވިދާޅުވި އެވެ. އަދި ކަރެކްޝަނަލް ސަރވިސްގެ ބައެއް މުވައްޒަފުން ވެސް މި ކޯހުގައި ބައިވެރިވެފައި ވާކަމީ އުފާ ކުރާ ކަމެއް ކަމަށާއި، މީގެ ސަބަބުން މުސްތަޤުބަލުގައި ކިޔަވައިދޭ މުދައްރިސުން ހޯދުމުގެ ބުރަ ވަރަށް ބޮޑުތަން ލުއި ވެގެންދާނެ ކަމަށް ވެސް ހާޝިމް ވިދާޅުވި އެވެ.
މީގެއިތުރުން ޑެޕިއުޓީ ކޮމިޝަނަރ އޮފް ޕްރިޒަންސް އިބްރާހިމް މުޙައްމަދު ދީދީ ވިދާޅުވީ، ކުށެއް ކުރީމާ އޭގެ މާނަ އަކީ ހަމައެކަނި ޖަލެއްގައި ބަންދުކޮށްފައި ބެހެއްޓުން ނޫން ކަމަށެވެ. ޤައިދީން ރިހެބިލިޓޭޓް ކުރުވާ، ފައިދާހުރި ބައެއްގެ ގޮތުގައި އެމީހުން މުޖުތަމައަށް އަނބުރާ ނެރުމަށް ވެސް މަސައްކަތްތަކެއް ކުރަން ޖެހޭ ކަމަށް ވެސް ޑީސީޕީ ވިދާޅުވި އެވެ. އަދި މި ސަރވިސް އިން ހިންގާ މިފަދަ ކޯސްތަކަށް ޤައިދީން ވެސް އެއްބާރުލުން ދީ، މި ފަދަ ފުރުޞަތުތަކުގެ ބޭނުން އެންމެ އެދެވޭގޮތަކަށް ހިފަން ޖެހޭ ކަމަށް ވެސް މުޙައްމަދު ދީދީ ވަނީ ވިދާޅުވެފައެވެ.
