ކުރިއަށް އޮތް މަޖިލިސް އިންތިހާބުގެ ރީރަޖިސްޓްރޭޝަންގެ ކުރުމުގެ މުއްދަތު މިރޭ 10 ޖަހަންދެން އިތުރުކޮށްފިއެވެ.
މިއަދުގެ މެންދުރުފަހު 3:00 އަށް އިންތިހާބުގެ ރީ ރަޖިސްޓް ކުރުމުގެ ފުރުސަތު ކުރިން އޮތް ނަމަވެސް މިހާރު ވަނީ އެފުރުސަތު އިތުރުކޮށްފައެވެ.
އިލެކްޝަންގެ ތަރުޖަމާނު، އަދި އެކޮމިޝަންގެ މެމްބަރު އަހުމަދު އަކުރަމް ވިދާޅުވެފައި ވަނީ އެ ފުރުސަތު 10 ޖަހަންދެން އިތުުރު ކޮށްފައިވާނެ ކަމަށެވެ.
އަކުރަމް ވިދާޅުވެފައި ވަނީ ރީ ރަޖިސްޓްރީ ކުރަން ފުރަތަމަ ހުޅުވާލި އިރު، އެންމެ ކުރިން މީހުން ހުށަހެޅި އަދަދު މަދު ނަމަވެސް، މިދިޔަ ދެ ދުވަހެއްގެ ތެރޭގައި އެ އަދަދު 8000 ވުރެ މައްޗަށް އަރާފައިވާ ކަމަށެވެ. އަދި އެ ރޭޓަށް ބަލާ އިރު، އިންތިހާބުގައި ވީހާވެސް ގިނަ އަދަދެއްގެ ބަޔަކަށް ފުރުސަތު ދިނުމަށް ވަގުތު އިތުރު ކުރި ކަމަށްވެސް އަކުރަމް ވަނީ ފާހަގަކޮށްފައެވެ.
މިފަހަރު މަޖިލިސް އިންތިހާބަށް ރީރަޖިސްޓްރީ ކުރަން ޖެހޭނީ ރިޔާސީ އިންތިހާބުގައި ވޯޓު ލި ތަން ނޫން، އެހެން ތަނަކަށް ވޯޓު ލާން ޖެހޭ މީހުންނެވެ.
