މުއިއްޒުގެ މައްސަލަ ފުލުހަށް ފޮނުވަން ފާސްކުރީ، މާލޭ މޭޔަރުކަމަށް އަންނާނެކަން ޔަޤީންވާތީކަމަށް ވިލިމާލެ ދާއިރާގެ ކުރީގެ މެމްބަރު އަހުމަދު ނިހާން ޙުސެއިން މަނިކު ވިދާޅުވެއްޖެއެވެ.

މިއަދު ކުރެއްވި ޓްވީޓެއްގައި ނިހާން ވިދާޅުވީ، ކުރީގެ ހައުސިން މިނިސްޓަރު ޑރ. މުއިއްޒުގެ މައްސަލަ ފުލުހަށް ހުށަހަޅަން ފާސްވެގެން ދިޔައީ މާލޭ މޭޔަރުކަމުގެ ގޮނޑި ކުރިއަށްއޮތް އިންތިޚާބުގައި ކާމިޔާބުކުރައްވާނެކަން ޔަޤީންވާތީ ވީގޮތެއްކަމަށެވެ.

ނިހާން މިހެން ވިދާޅުވެފައިވާއިރު، ނޫމަޑި ރިސޯޓްސް އެންޑް ރެސިޑެންސްގެ މައްސަލައާ ގުޅިގެން ރައްޔިތުންގެ މަޖިލީހުގެ މާލިއްޔަ ކޮމިޓީގައި ތުމުޢިއްޒު އިތުރުފުޅު ހެއްދެވި މައްސަލަ ފުލުހުންނަށް ހުށަހަޅަން މިއަދުވަނީ ފާސްކޮށްފައެވެ.

ޖަލްސާގައި ބައިވެރިވެވަޑައިގެންނެވި 63 މެމްބަރުންގެ ތެރެެއިން 60 މެމްބަރުންގެ އިއްތިފާގުން ރިޕޯޓް މަޖިލީހަށް ބަލައިގެންފައިވާއިރު، ފާސްކުރި ރިޕޯޓްގައި ހިމެނެނީ ދެ ކަމެކެވެ. އެއީ ނޫމަޑި މައްސަލަ ކޮމިޓީން ދިރާސާކުރި އިރު، ކޮމިޓީއަށް ހާޒިރުކޮށް މެމްބަރުން ކުރެއްވި ސުވާލަށް ޖަވާބު ދެއްވުމުގައި ޑރ. މުޙައްމަދު މުއިއްޒު އިތުރުފުޅު ހެއްދެވި ކަމަށް ބެލެވޭތީ އެ މައްސަލަ ތަހުގީގުކުރަން ފުލުހަށް ފޮނުވުމާއި، ނޫމަޑި މައްސަލައިގައި އިހުމާލުވި ފަރާތްތަކުގެ މައްސަލަ ބަލަން، އޭސީސީއަށް ފޮނުވުމުވެ.

ކޯޓުން ބޭރުން ނޫމަޑި މައްސަލަ ސަރުކާރުން ޙައްލުކޮށްފައިވާއިރު، މިމައްސަލަ ޙައްލުކުރުމަށް ސަރުކާރުން 55 މިލިއަން އެމެރިކާ ޑޮލަރު އެކުންފުންޏަށް ދައްކާފައިވަނީ މިދިޔަ އޮގަސްޓްމަހުއެވެ. ނޫމަޑިއާއެކު ސެޓްލްމަންޓް އެގްރީމެންޓްގައި ދިވެހި ސަރުކާރުގެ ފަރާތުން ސޮއިކުރައްވާފައިވަނީ 25 އޮގަސްޓް 2019 ގައެވެ.