ހއ އަތޮޅުގެ ރަށެއްގައި އަންހެން ކުއްޖަކު ބްލެކްމެއިލް ކުރި މައްސަލައެއް ފެންމަތިވެއްޖެއެވެ.

މިކަން ހިނގަ ރަށުން ވާހަކަ ދެއްކި މީހަކު މި ނޫހަށް މައުލޫމާތު ދެއްވަމުން ބުނީ ޑްރޯން އެއް އަރުވައި ގެއެއްގެ ގިފިލި ތެރޭގައި ހުރި އަންހެން ކުއްޖެއްގެ ބަރަހަނާ ފޮޓޯތަކެއް ނަގައި އެކުއްޖާ ބްލެކް މެއިލް ކުރަން އުޅުމުން އާންމުން އެއްވެ ރަށުތެރެ ކޮންމެސްވަރަކަށް ހަލަބޮލިވި ކަމަށެވެ.

އެރަށުން ވާހަކަ ދެއްކި ފަރާތަކުން ބުނީ، މިހާދިސާގައި ޑްރޯން އަރުވާފައިވަނީ އެރަށުގައި ތިބި ފުލުހެއް ކަމަށާއި، ބްލެކްމެއިލް ކުރުމުގެ ގޮތުން ބަރަހަނާ މަންޒަރުތައް ފޮނުވާފައިވާ ކަމަށެވެ.

މިކަމާ ގުޅިގެން އެރަށު ކައުންސިލްގެ ރައީސް ވިދާޅުވީ، ޑްރޯން ބޭނުންކޮށްގެން ފޮޓޯ ނަގައި ބްލެކްމެއިލް ކުރި މައްސަލައެއްގެ މައުލޫމާތު ކައުންސިލަށް ލިބިފައި ނުވާ ކަމަށެވެ.

މިކަމާއި ގުޅިގެން ފުލުހުންގެ ބަހެއް އަދި ވަނީ ލިބޭގޮތް ނުވެފައެވެ.