އަނެއްކާވެސް މާބަނޑު އަންހެނެއްގެ ބަނޑަށް ދަރިފުޅު ނިޔާވެއްޖެއެވެ.
މައުލޫމާތު ލިބިފައިވާ ގޮތުގައި މިހާދިސާ ހިނގާފައިވަނީ މިވަގުތު މޮނިޓަރިންގެ ހާލަތުގައި އޮތް ށ. ނަރުދޫގައިއެވެ.
މި އަންހެން މީހާ ބަނޑުގައި ރިއްސާތީ ނަރުދޫ ހެލްތު ސެންޓަރަށް ދިޔައީ އިއްޔެގެ ވަގުތެއްގައި ކަމަށާއި އެމީހާ ވިހުމަށް ޑޮކްޓަރުން ދީފައިވާ މުއްދަތަކީ މިމަހުގެ 30 ވަނަ ދުވަސް ކަމަށް މައުލޫމާތު ލިބެއެވެ. ނަރުދޫ ސިއްހީ މަރުކަޒަށް ދެއްކުމުން ނަރުދޫ ސިއްހީ މަރުކަޒުގައި މާބަނޑު މީހަކު ވިއްސޭނެ އިންތިޒާމު ނެތުމުން އެ ސެންޓަރުން ވަނީ ށ. ފުނަދޫގައި ހުންނަ އަތޮޅު ހޮސްޕިޓަލަށް އެ ޕޭޝަންޓު ގެންދިއުމުގެ މަސައްކަތް ކޮށްފައެވެ. ނަމަވެސް ފުނަދޫ ހޮސްޕިޓަލުން ވަނީ ކޮވިޑްގެ ކަންކަމަށް ހޮސްޕިޓަލު މަރާމާތު ކުރާތީ މާބަނޑު މީހަކު ވިއްސަން އެ ހޮސްޕިޓަލު އޮތީ ތައްޔާރަށް ނޫން ކަމަށް ބުނެ ކުޅުދުއްފުށީ ހޮސްޕިޓަލަަށް ބަލި މީހާ ގެންދިއުމަށް ލަފާދީފައެވެ.
އޮންލައިން ނޫސް "ވަންއޮންލައިން" ގައި ރިޕޯޓް ކޮއްފައިވާ ގޮތުގައި ނަރުދޫ ހެލްތު ސެންޓަރުން ވަނީ އެ ޕޭޝަންޓު ކުޅުދުއްފުއްޓަށް ގެންދިއުމަށް އާސަންދައާއި، އެނޫންވެސް ކަންކަން ހަމަޖައްސައި އާއިލާއަށް އެކަން އަންގައިފައެވެ. ނަމަވެސް އާއިލާއިން ބޭނުންވީ، އެ ދުވަހުން ދުވަހަށް ނުގޮސް އަދި އެއް ދުވަހު މަޑުކޮށްލުމަށް ކަމަށްވެސް ބުނެފައިވެއެވެ.
މައުލޫމާތު ލިބިފައިވާ ގޮތުގައި މި އަންހެންމީހާ މިއަދު ވަނީ ށ. މިލަންދުއަށް ގެންގޮސްފައެވެ. އަދި މިލަންދޫ ސިއްހީ މަރުކަޒުން ވަނީ ބަނޑުގައިވާ ތުއްތު ކުއްޖާގެ ތޮޅުން ކުޑަކޮށް ދަށްކަމަށް ބުނެ ވަގުތުން ކުޅުދުއްފުއްޓަށް ގެންދަން ލަފާދީފައި ކަމަށްވެސް މައުލޫމާތު ލިބެއެވެ. އެއާއެކު އާސަންދައިން ހުރިހާ ކަމެއް ހަމަޖައްސައި މިއަދުގެ މެންދުރު ފަހުގެ ވަގުތެއްގައި ކުޅުދުއްފުއްޓަށް ދާން މި އަންހެންމީހާ ދަތުރުފެށި ކަމަށާއި، ބަނޑަށް ކުއްޖާ މަރުވިކަން އެނގުނީ ކުޅުދުއްފުއްޓަށް ގޮސް ދެއްކުމުން ކަމަށްވެސް ވަނީ މައުލޫމާތު ލިބިފައެވެ.
މިފަހުން އއ. ތޮއްޑޫގައިވެސް ވަނީ މާބަނޑު އަންހެނެއްގެ ބަނޑަށް ދަރިފުޅު މަރުވި މައްސަލައެއް ފެންމަތިވެފައެވެ.
