މިއަދު ހެންވޭރު ގެއެއްގައި ނިޔާވެފައި އޮއްވާ ފެނުނު މީހާ އަށް އަނިޔާކޮށްފައިވާކަމަށް ނުބެލެވޭ ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ، ހެންވޭރު ގެއެއްގައި ނިދާފައި އޮތް މީހެއްގެ ޚަބަރެއް ނުވެގެން ބެލިއިރު ނިޔާވެފައި އޮތް މައްސަލައެއް މިއަދު ހެނދުނު 10:24 ހާއިރު ފުލުހުންނަށް ހުށަހެޅިފައިވާކަމަށެވެ.
މިމައްސަލާގެ ތަޙުޤީޤުގައި މިހާތަނަށް ބެލިބެލުމުން ނިޔާވި މީހާގެ އަނގައިން ފޮނު އައިސްފައިވާކަން ފާހަގަކުރެވިފައިވާކަމަށް ފުލުހުންވަނީ ވިދާޅުވެފައެވެ. އަދި ނިޔާވި މީހާގެ ނިތްކުރީގައި ތަންކޮޅެއް ކަނޑައިގެން ގޮސްފައިވާކަން ފާހަގަކުރެވުނުނަމަވެސް، ނިތްކުރީގައިވާ އަނިޔާއަކީ މީހާގެ ފުރާނައަށް ގެއްލުންވާވަރުގެ އަނިޔާއެއް ނޫންކަން ފާހަގަކުރެވޭކަމަށްވެސް ފުލުހުންވަނީ ވިދާޅުވެފައެވެ.
މީގެއިތުރުން ފުލުހުން ވިދާޅުވީ، މިހާތަނަށް ބެލިބެލުމުން ނިޔާވި މީހާގެ ނިތްކުރީގައިވާ ޒަޚަމްއަކީ އެހެން މީހެއްގެ ފުށުން ލިބިފައިވާ އަނިޔާއެއްކަމަށް ބެލެވޭ އެއްވެސްކަމެއް ފާހަގަ ކުރެވިފައިނުވާކަމަށެވެ.
މިއަދު ނިޔާވެފައި އޮއްވާ ފެނުނީ ހ. އަންނާރުމާގޭ އުމުރުން 28 އަހަރުގެ ހުސެއިން ހިޝާމް ރަޝީދުއެވެ.
މިހާދިސާއާއި ގުޅިގެން އިތުރަށް ބަލާ ސާފުކުރަންޖެހޭ ކަންކަން ސާފުކޮށް ފުލުހުންދަނީ މިހާދިސާ އިތުރަށް ތަޙުޤީޤުކުރަމުންނެވެ.
