ސަލާމް ބުނަން ޖެހޭ ކޮންމެ ހާލަތަކީ މެޑިކަލް ސެޓްފިކެޓް ލިބޭނެ ހާލަތެއްނޫން ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވިދާޅުވެއްޖެއެވެ.
މީކާއިލް މިހެން ވިދާޅުވެފައިވަނީ، މުވައްޒަފުން ބަލިވެގެން ސަލާމް ބުނާނަމަ، މެޑިކަލް ސެޓްފިކެޓް ހުށަހަޅަން އޮންނަ އުސޫލު ބަދަލުކުރުމަަށް، ވަޒީފާއާ ބެހޭ ގާނޫނަށް ހުށަހަޅާފައިވާ އިސްލާހު ރަނގަޅުކަމަށް މަޖިލީހުގެ މިއަދުގެ ޖަލްސާގައި އެ މަޖިލީހުގެ ފުވައްމުލަކު އުތުރު ދާއިރާގެ މެމްބަރު މުހައްމަދު ރަޝީދު ވިދާޅުވެފައި ވަނިކޮށެވެ.
މުވައްޒަފުން ބަލިވެގެން ސަލާމް ބުނާނަމަ، މެޑިކަލް ސެޓްފިކެޓް ހުށަހަޅަން މިހާރު ޖެހެނީ ބަލިވެ ވަޒީފާއަށް ހާޟިރުނުވާ ދުވަހުގެ އަދަދަކީ ދެދުވަހަށްވުރެ ދިގު މުއްދަތެއް ނަމައެވެ. ދެދުވަހު ބަލިވެ ވަޒީފާއަށް ނައިނަމަވެސް މެޑިކަލް ސެޓްފިކެޓް ހުށަހަޅާކަށް ނުޖެހެއެވެ. ނަމަވެސް، މި އުސޫލަށް ބަދަލު ގެނައުމަށް މިހާރުވަނީ މަޖިލީހަށް ހުށަހަޅައިފައެވެ. މި ހުށަހެޅުމުގައި ވާގޮތުން ވަޒީފާއަށް ނުނިކުންނަ ކޮންމެ ދުވަހަކު މެޑިކަލް ސެޓްފިކެޓް ހުށަހަޅަން ޖެހޭނެއެވެ.
މިމައްސަލައާއި ގުޅިގެން މީކާއިލް ކުރި ޓުވީޓެއްގައި ބުނެފައިވަނީ، ސަލާމް ބުނާ ކޮންމެ ދުވަހަކު މެޑިކަލް ސެޓްފިކެޓް ހުށައެޅުން ލާޒިމް ކުރުމަކީ މަސައްކަތްތެރިންގެ ނަފްސާނީ ދުޅަހެޔޮކަން ކަށަވަރުކުރުމަށް ބާރުއެޅުމާއި ދުރަށް، ފަހަތަށް އެޅޭ ފިޔަވަޅެއް ކަމަށެވެ. އަދި ސަލާމް ބުނަން ޖެހޭ ކޮންމެ ހާލަތަކީ މެޑިކަލް ސެޓްފިކެޓް ލިބޭނެ ހާލަތެއްނޫން ކަމަށެވެ.
މީގެކުރިންވެސް މި ހުށަހެޅުމަށް ގިނަބަޔަކުވަނީ ފާޑުކިޔާފައެވެ. މިގޮތުން މިކަން މިގޮތަށް ފާސްވެއްޖެނަމަ މިކަމަކީ މައިގުރެއިން، ނަފްސާނީ ބަލިތައް އަދި މިނޫންވެސް އެކިއެކި ބަލިތައް ތަހައްމަލުކުރާ މަސައްކަތްތެރިންނަށް ދެވޭނެ ވަރަށް ބޮޑު ދެރައެއް ކަމަށް މިފަރާތްތަކުން ފާހަގަ ކުރެއެވެ.
