ސިފައިންނަށް ސިފައިންގެ ހޮސްޕިޓަލް، ސެނަހިޔާ ތަރައްގީ ކުރުމާ ބެހޭގޮތުން ޑިފެންސް މިނިސްޓްރީން އިންޑިއާގެ ސިފައިންނާ މަޝްވަރާކޮށްފިއެވެ.
އެމްއެންޑީއެފް އިން ވިދާޅުވީ، އެ މަޝްވަރާތައް ކުރިއަށް ގެންގޮސްފައި ވަނީ ރާއްޖެއަށް ވަޑައިގެންއުޅުއްވާ އިންޑިއާގެ ސިފައިންގެ ވަފުދުގައި ހިމެނި ވަޑައިގަންނަވާ މޭޖަރ ޖެނެރަލް ޑރ. ޕްރަޝަންތް ބާރްދްވާޖްއާ ޑިފެންސް މިނިސްޓަރު މާރިޔާ އަހުމަދު ދީދީއާ އެކު ބޭއްވި ބައްދަލުވުމެއްގައި ކަމަށެވެ.
އާދިއްތަ ދުވަހު ބޭއްވި އެ ބައްދަލުވުމުގައި ރާއްޖޭގެ ސިއްހީ ނިޒާމު އިތުރަށް ހަރުދަނާ ކުރުމުގެ އިތުރުން ސެނަހިޔާ ހޮސްޕިޓަލް އިތުރަށް ތަރައްގީ ކުރުމާ ބެހޭ ގޮތުން މިނިސްޓަރު މަޝްވަރާކުރެއްވި ކަމަށް ޑިފެންސް މިނިސްޓްރީން ވިދާޅުވިއެވެ.
ދިވެހި އަސްކަރިއްޔާގެ ޞިއްޙީ ނިޒާމް ހަރުދަނާ ކުރުމަށް އިންޑިއާއިން އެހީވެދެވިދާނެ ގޮތްތަކާ މެދުގައި އިންޑިއާ ސިފައިންގެ ބޭފުޅުންނާއެކު މަޝްވަރާ ކުރައްވާފައިވާއިރު، ވޭތުވެދިޔަ 25 އަހަރު އިންޑިއާ ސިފައިން ރާއްޖޭގެ އަސްކަރިއްޔާއަށް ވެދެއްވާފައިވާ އެހީތެރިކަން ފާހަގަކޮށް ޝުކުރު އަދާކުރައްވާފައިވެއެވެ.
