ރާއްޖެ އިން ކޮވިޑް-19 ޖެހިފައިވާ އިތުރު މީހަކު ނިޔާވެއްޖެ އެވެ.
ހެލްތު ޕްރޮޓެކްޝަން އެޖެންސީން ވިދާޅުވީ، ކޮވިޑް-19 ޖެހި ހާލު ދެރަވެގެން ދަރުމަވަންތަ ހޮސްޕިޓަލުގެ DH11 ގައި އެޑްމިޓްކުރި 43 އަހަރުގެ ފިލިޕީންސްއަށް ނިސްބަތްވާ ފިރިހެނަކު މިއަދު ނިޔާވެފައިވާ ކަމަށެވެ.
މިއީ ކޮވިޑް-19 ޖެހިގެން ރާއްޖެއިން ނިޔާވި 9 ވަނަ މީހާއެވެ. ދަރުމަވަންތަ ހޮސްޕިޓަލްގައި މިހާރު ދަނީ ކޮވިޑް-19 ޖެހިފައިވާ ހާލުބޮޑު އިތުރު ދެ މީހަކަށްވެސް ފަރުވާދެމުންނެވެ.
ރާއްޖެއިން މިހާތަނަށް ކޮވިޑް-19 އަށް 2337 މީހުން ވަނީ ޕޮޒިޓިވް ވެފައެވެ. މި ބަލިން ރަނގަޅުވީ މީހުންގެ އަދަދު މިހާރުވަނީ 1927 އަށް އަރާފައިވާއިރު މިވަގުތު ފަރުވާ ހޯދަމުންދަނީ 395 މީހުންނެވެ.
