އިކޮނަމިކް މިނިސްޓަރ ފައްޔާޒު އިސްމާއިލްގެ އިތުބާރު ނެތް ކަމުގެ މައްސަލަ ވައްދަން 25 މެމްބަރުންގެ ސޮއި ކުރައްވާފައިވާ ކަމަށް އަޑު ފެތުރެން ފަށައިފިއެވެ.
މަޖިލިސް މެމްބަރަކާއި ހަވާލާ ދެއްވާ އޮންލައިން ނޫސް ރާއްޖެއެމްވީ ގައި ބުނެފައިވަނީ، އިއްޔެއިން ފެށިގެން މިއަދާއި ހަމަޔަށް އިކޮނަމިކް މިނިސްޓަރ ފައްޔާޒު ގެ އިތުބާރު ނެތްކަމުގެ މައްސަލަ މަޖިލީހަށް ވައްދަން 25 މެމްބަރަކު ސޮއިކޮށްފައިވާ ކަމަށެވެ.
މިހާތަނަށް އައިއިރު އެމްޑީޕީގެ އެއްވެސް މަޖިލިސް މެންބަރަކު ފައްޔާޒުގެ އިތުބާރު ނެތްކަމުގެ މައްސަލައެއް ވައްދަން އުޅޭކަމަށް ފާޅުގައި ބުނެފައި ނުވެއެވެ. ނަމަވެސް އިއްޔެ އިން ފެށިގެން ނަން ނުޖަހައި، މަޖިލިސް މެންބަރުންނާއި ހަވާލާ ދެއްވައި ބައެއް މީޑިއާ ތަކުން ވަނީ ފައްޔާޒުގެ އިތުބާރު ނެތްކަމުގެ މައްސަލަ މަޖިލީހަށް ވައްދަން ސޮއި ހޯދުމުގެ މަސައްކަތް ފަށާފައިވާ ކަމަށް ވިދާޅުވެފައެވެ.
ފައްޔާޒު އިތުބާރު ނެތަކުމުގެ މައްސަލަ ވެއްދުމުގައި އިސްކޮށް އުޅެނީ އެމްޑީޕީގެ ރައީސް އަދި މަޖިލިސް ރައީސް މުޙައްމަދު ނަޝީދު ކަމަށް އަޑުތައް ފެތުރިފައިވާއިރު ފައްޔާޒު ވަނީ، ރައީސް ނަޝީދު ފައްޔާޒުގެ އިތުބާރު ނެތްކަމަށް ސޮއި ނުކުރައްވާނެ ކަމަށް ވިދާޅުވެފައެވެ.
ފައްޔާޒު އަށް އިތުބާރު ކުރައްވާކަމަށް ވިދާޅުވެ އެމްޑީޕީގެ ބައެއް މަޖިލިސް މެންބަރުން ގެންދަވަނީ ފައްޔާޒުގެ ދިފާޢުގައި ވާހަކަފުޅު ދައްކަވަމުން ނެވެ.
އިދިކޮޅުން ބުނެފައިވަނީ ފައްޔާޒުގެ މަައްސަލައަކީ އިދިކޮޅުގެ ފޯކަސް ގެއްލުވާލުމަށް ދައްކާ ވާހަކައެއް ކަމަށް ވިދާޅުވެފައެވެ.
