ޓޫރިޒަމް މިނިސްޓަރ ޑރ. މައުސޫމަށް ރުހުން ދިނުމުގެ މައްސަލަ އަލުން އަނބުރާ ސަރުކާރުގެ މަސްޢޫލިއްޔަތު އަދާކުރާ މިންވަރުބަލާ ކޮމެޓީއަށް ފޮނުވާލުމަށް މަޖިލީހުން ފާސްކޮށްފި އެވެ.
ޓޫރިޒަމް މިނިސްޓަރަކަށް ރައީސް ޞޯލިޙް އައްޔަން ކުރައްވާފައިވާ ޑރ. މައުސޫމުގެ ނަންފުޅަށް ރުހުން ހޯދުމަށް މަޖިލިސް އަށް ފޮނުއްވެވުމުން، އެ މައްސަލަ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީން ދިރާސާކޮށް މަޖިލީހުގެ ތަޅުމަށް ފޮނުއްވުމުން، މަޖިލީހުގެ ސަރުކާރުގެ މަސްޢޫލިއްޔަތު އަދާކުރާ މިންވަރުބަލާ ކޮމެޓީއަށް އަލުން އަނބުރާ ފޮނުއްވުމަށް ހުށައަޅުއްވާފައި ވަނީ ގަލޮޅު އުތުރު ދާއިރާގެ މެންބަރު އީވާ އަބްދުﷲ އެވެ.
އިވާގެ ހުށައެޅުމަށް ތާޢީދު ކުރައްވާފައިވަނީ އައްޑޫ މީދޫ ދާއިރާގެ މެންބަރު ރޮޒައިނާ އާދަމް އެވެ.
ސަރުކާރުގެ މަސްޢޫލިއްޔަތު އަދާކުރާ މިންވަރުބަލާ ކޮމެޓީއަށް އަލުން އަނބުރާ އެ ރިޕޯޓު ފޮނުއްވުމަށް ވޯޓުގައި ބައިވެރިވި 60 މެންބަރުންވެސް ވަނީ ވޯޓު ދެއްވާފައެވެ.
ޓޫރިޒަމް މިނިސްޓަރަކަށް ހުންނެވި އަލީ ވަހީދު އެ މަޤާމުން ވަކި ކުރރެއްވުމަށްފަހު ޑރ މައުސޫމް މަޤާމަށް އައްޔަން ކުރައްވާފައިވަނީ އޮގަސްޓު މަހުގެ 6 ވަނަ ދުވަހު އެވެ.
ޑރ އަބްދުﷲ މައުސޫމަށް ރުހުން ދިނުމުގެ މައްސަލަ ދިރާސާކުރަން ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާއި ކޮމިޓީއަށް ފޮނުވާފައިވަނީ އޮގަސްޓު 10 ވަނަ ދުވަހު އެވެ.
ޑރ. މަޢުސޫމް ޓޫރިޒަމް މިނިސްޓަރުކަމުގެ މަގާމަށް ޢައްޔަންކުރުމުގެ ކުރިން ހުންނެވީ ސިންގަޕޫރަށް ރައްޖެއިން ކަނޑައަޅާފައިވާ ސަފީރުގެ މަޤާމުގައެވެ. އަދި ކޮމަންވެލްތް އޮފް އޮސްޓްރޭލިއާއަށް ދިވެހިރާއްޖެއިން ކަނޑައަޅާ ނޮން-ރެސިޑެންޓް ސަފީރުކަމުގެ މަޤާމާއި، ނިއުޒިލޭންޑަށް ދިވެހިރާއްޖެއިން ކަނޑައަޅާ ނޮން-ރެސިޑެންޓް ސަފީރުގެ މަޤާމު ވެސް ވަނީ ފުރުއްވާފައެވެ. އަދި ކެލާ ދާއިރާގެ ރައްޔިތުންގެ މަޖިލީހުގެ މެންބަރުކަން 2009 ވަނަ އަހަރު ވަނީ ޑރ. މަޢުސޫމް ފުރުއްވާފައެވެ.
ޑރ. މަޢުސޫމް ވަނީ މީގެ ކުރިން މިނިސްޓަރ އޮފް ޓޫރިޒަމް އެންޑް ސިވިލް އޭވިއޭޝަންގެ މަޤާމާއި، ޑެޕިއުޓީ މިނިސްޓަރ އޮފް ޓޫރިޒަމް އެންޑް ސިވިލް އޭވިއޭޝަންގެ މަޤާމާއި، މިނިސްޓަރ އޮފް އެންވަޔަރަންމަންޓް، އެނަރޖީ އެންޑް ވޯޓަރގެ މަޤާމު ފުރުއްވާފައެވެ.
