ކޮވިޑް-19 އާއި ގުޅިގެން ރައްޔިތުންނަށް ހިލޭ ކަޑުގެ ބާވަތްތައް ހިލޭ ފޯރުކޮށްދިނުމަށް ގޮވާލާ މަޑުއްވަރި ދާއިރާގެ މެންބަރު އާދަމް ޝަރީފް އުމަރު ހުށައެޅި ކުއްލި މައްސަލަ މަޖިލީހުން ބޭރު ކޮށްލައިފިއެވެ.
މި ކުއްލި މައްސަލަ ހުށަހަޅަމުން އާދަމް ޝަރީފް ވިދާޅުވީ ކޮވިޑް-19 އާއި ގުޅިގެން ދިވެހިރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލަން ކުރުމާއި ގުޅިގެން ރައްޔިތުން ރަށު ބަންދުގައި ގިނަ ދުވަސްތަކެއް ވަންދެން ތިބެން ޖެހުމާއި ގުޅިގެން ދިވެހިން ކުރަމުންދިޔަ ހުރިހާ މަސައްކަތްތަކެއް ހުއްޓާލަން ޖެހިފައިވާ ކަމަށެވެ.
މީހުންގެ އާމްދަނީ އެއްކޮށް ހުއްޓުފައިވާ ކަމަށާއި ވަޒީފާ ގެއްލުމުގެ ސަބަބުން ދިރިއުޅުމުގެ ހާލަތު ވަރަށް ބޮޑަށް ދަށަށް ގޮސްފައިވާ ކަމަށް އާދަމް ޝަރީފް ވިދާޅުވިއެވެ.
ކޮވިޑް-19 ގެ ބަލިމަޑުމުން ރާއްޖެ ކޮންޓްރޯލް ނުކުރެވި ލޮކްޑައުން އަކަށް ދާން ޖެހިދާނެ ކަމުގެ އިންޒާރު ސިއްހީ މާހިރުން ދެމުންދާތީ އާއި އާމްދަނީ އެއް ލިބޭނެ ގޮތެއް ނެތި ގިނަ ދުވަސްތަކެއް ވަމުންދާތީވެ ރައްޔިތުންގެ ބަނޑުފުރާނަ މުއްތިކުރުމަށް ބޭނުންވާ ފުރާގު ރައްޔިތުންނަށް ލިބޭނެކަން ކަށަވަރު ކުރުމަށްޓަކައި ރައްޔިތުންނަށް މަސައްކަތް ކުރެވޭނެ ފަދަ ހާލަތަކަށް ކޮވިޑް-19 ގެ ބަލިމަޑުކަން ކޮންޓްރޯލް ކުރެވެންދެން ދައުލަތުގެ ވަޒީފާ އަދާ ކުރާ މީހުންނާއި ދައުލަތުގެ އިނާޔަތެއް ލިބޭ މީހުން ފިޔަވާ އެހެން ހުރިހާ ދިވެހިންނަށް ކާޑުގެ ބާވަތްތައް ސަރުކާރުން ހިލޭ ފޯރުކޮށްދިނުމަށް ކުއްލި މައްސަލައިގައި ވެއެވެ.
ނަމަވެސް، ކުއްލި މައްސަލަ ބަލައިގަތުމަށް ވޯޓު ދެއްވީ 7 މެމްބަރުންނެވެ. މި މައްސަލަ އަށް ބަހުސް ކުރަން ނުފެންނަ ކަމަށް 24 މެމްބަރުން ވޯޓު ދެއްވާފައިވެއެވެ.
