ރައްޔިތުންގެ މަޖިލީހުގެ ޖަލްސާތައް 6 މަސް ދުވަހު މެދުކެނޑުމެއް ނެތި، މި އަހަރު ފުރަތަމަ ފަހަރަށް ޗުއްޓީއަށް ދިއުމަށް މަޖިލީހުގެ ޖަލްސާތައް މެދުކަނޑާލާފައިވާއިރު، 68 އިންސައްތަ މަސައްކަތް ނިމިފައިވާކަމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވިދާޅުވެއްޖެއެވެ.
ޖުމުލަ 76 ޖަލްސާ ބޭއްވުމަށް ފަހު މަޖިލިސް މިއަދު ޗުއްޓީއަށް ދިޔައިރު، މި ދައުރުގެ ތެރޭގައި 21 ޤާނޫނުގެ މަސައްކަތައި، 9 ޤަރާރާއި، ސަރުކާރުން ހުށަހަޅުއްވާފައިވާ 18 މައްސަލައާއި ރިޔާސަތުން ހުށަހަޅުއްވާފައިވާ 11 މައްސަލަ އަދި 16 ކުއްލި މައްސަލަ ނިންމެވާފައިވާކަމަށް އީވާ ވިދާޅުވިއެވެ.
އީވާ ވިދާޅުވީ، ބޮޑެތި ބިލްތަކުގެ މަސައްކަތް ނިންމައި މިއަދު އެ ބިލްތައް އިސްލާހުކޮށްފައިވެއެވެ. އެގޮތުން ފާސްކުރެވުނު ބިލްތަކުގެ ތެރެއިން، ޖިނާއި އިޖުރާއަތުގެ ޤާނޫނަށް މުހިއްމު އިސްލާހުތަކެއް ގެނެވުމާއި، ފެނާއި ނަރުދަމާގެ ބިލް ފާސްކުރެވުމާއި، ދިވެހިރާއްޖޭގެ ޤާނޫނުގެ ފަންނުގެ ބިލް ފާސްކުރެވުމާއި، އެއްގަމު ދަތުރުފަތުރުގެ ބިލަށް އިސްލާހް ގެނައުމާއި، އަދި ރާއްޖޭގެ ވިޔަފާރީގެ ދާއިރާގައި ވާދަވެރިކަން އުފައްދާ ދެމެހެއްޓުމުގެ ބިލް ފާސްކުރެވުނު ކަމަށެވެ.
މީގެ އިތުރުން، ދިވެހިރާއްޖޭގެ ވަޒީފާގެ ގާނޫނަށް އިސްލާހު ގެނައުމުގެ ބިލް ފާސްކުރުމާއި، އާއްމު ސިއްހަތު ކުއްލި ނުރައްކަލުގެ ބިލް ފާސްކޮށް މިއަދު ވަނީ ޤާނޫނަށް ހެދިފައިކަމަށް އިވާ ވިދާޅުވިއެވެ.
ބްރޮޑްކާސްޓިން ކޮމިޝަނަށް މެންބަރުންނަށް އައްޔަންކުރެވުނު ކަމަށާއި، ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނުގެ ދަށުން ދިވެހިރާއްޖޭގައި އަލަށް ޗިލްޑްރެންސް އޮމްބަޑްސްޕާސަންގެ މަޤާމަށް މީހަކު އައްޔަން ކުރުމާއި، ޓެކްސް އެޕީލް ޓްރިބިއުނަލްއަށް މެންބަރުން އައްޔަންކުރުމާއި، ސިވިލް ސާވިސް ކޮމިޝަންއާއި، ހިއުމަން ރައިޓްސް ކޮމިޝަންއާއި، ނޭޝަނަން އިންޓެގްރިޓީ ކޮމިޝަންގެ މަގާމުތަކަށް އައްޔަން ކުރާނެ މެންބަރުންނަށް ރުހުން ވެސް ދީފައިވާކަމަށް އީވާ ވިދާޅުވިއެވެ.
މީގެ އިތުރުން މެންބަރުން ހުށައެޅުއްވި މުހިއްމު މައްސަލަތަކުގެ ތެރޭގައި، ކޮވިޑް-19 އާއި ގުޅިގެން ސަރުކާރުން ކުރަމުންދާ މަސައްކަތުގައި، 17 ކޮމިޓީއަކުން މަސައްކަތްކޮށް ކޮވިޑް-19 ގެ ސަބަބުން ސަރުކާރުން އެޅި ފިޔަވަޅުތަކާ ގުޅޭ ގޮތުން ރައީސުލްޖުމްހޫރިއްޔާއަށް ލަފާ އަރުވާފައިވާ ކަމަށް އީވާ ވިދާޅުވިއެވެ.
މިއަހަރު ފުރަތަމަ ފަހަރަށް މަޖިލިސް ޗުއްޓީއަށް ގޮސްފައިވާއިރު، ކޮވިޑް-19 ގެ ބަލިމަޑުކަމުގެ ހާލަތު ދުނިޔެއަށް ކުރިމަތިވެ އާންމުކޮށް އެއްވެ އުޅުން ހުއްޓުމަކަށް ގެންނަން ޖެހުނު ހާލަތުގައި މަޖިލިސް ހުއްޓާލަން މެދުވެރިވިނަމަވެސް، މަސައްކަތްތައް މެދުކަނޑާނުލުމުގެ ގޮތުން އޮންލައިންކޮށް މަޖިލިސްގެ ޖަލްސާތައް ގިނަދުވަސްތަކެއްވަންދެން ކުރިއަށް ގެންގޮސްފައިވެއެވެ. އަދި މިއީ މުޅި ދުނިޔޭގައި ވެސް އޮންލައިންކޮށް މަޖިލިސް ބޭއްވި ފުރަތަމަ ފަހަރެވެ.
