އަމާޒަކީ މިއަންނަ އަހަރު 1 މިލިއަން ފަތުރުވެރިން ރާއްޖެ ގެނައުން ކަމުގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެ އެވެ.
ސީއެންއެމްއަށް ދެއްވި އިންޓަވިއުއެއްގައި މިނިސްޓަރ މައުސޫމް ވިދާޅުވީ، މިވަގުތު މި މަސައްކަތް ކުރަނީ ފަތުރުވެރިން ގެނައުމަށް ހުރިހާ މާކެޓަކަށް އަމާޒު ކޮށްގެން ކަމަށާއި ލަފާކުރަނީ ކުރިއަށް އަތް 4 މަސްތެރޭގައި ލައްކައަކަށްވުރެއް ގިނަ ޓޫރިސްޓުން އަންނާނެ ކަމަށެވެ.
އުންމީދު ކުރަނީ ރާއްޖެއަށް އަންނަ ފަތރުވެރިންގެ އަދަދު މަހަކަށް ވުރެ މަހެއް އިތުރުވެ 2021 ވަނަ އަހަރުނެ ފެށިގެން 1 މިލިއަން ފަތުރުވެރިން ރާއްޖެ ގެނައުމަށް ކަމުގައި މައުސޫމް ވިދާޅުވިއެވެ.
މިނިސްޓްރީ އޮފް ޓޫރިޒަމް އިން ވިދާޅުވީ، ރާއްޖެއަށް ޒިޔާރާތްކުރި ފަތުރުވެރިންގެ ތަފާސް ހިސާބުތައް ދައްކާގޮތުން ޖުލައި 15 ވަނަ ދުވަހު ރާއްޖޭގެ ބޯޑަރު ހުޅުވާލި ފަހުން 8 ސެޕްޓެމްބަރ އާއި ހަމައަށް ދުނިޔޭގެ އެކިއެކި ޤައުމުތަކުން ވަނީ ރާއްޖެއަށް 1769 ފަތުރުވެރިން ޒިޔާރާތްކޮށްފައި ކަމަށެވެ.
ފާއިތުވެ ދިޔަ އޮގަސްޓް މަހު ރާއްޖެ އަށް ޒިޔާރަތް ކުރާ ފަތުރުވެރިންގެ އަދަދު ވަނީ އިތުރުވެފައެވެ. އެގޮތުން ޖުލައި މަހު އެވަރެޖް ކޮށް ދުވާލެއްގެ މައްޗަށް ޒިޔާރަތް ކޮށްފައިވާ ފަތުރުވެރިންގެ އަދަދަކީ 100 ފަތުރުވެރިންނެވެ. ނަމަވެސް އޮގަސްޓް މަހު މި އަދަދު ވަނީ 218 އަށް އިތުރު ވެފައެވެ. އެގޮތުން ނިމިދިޔަ އޮގަސްޓް މަހު ދުނިޔޭގެ އެކިއެކި ޤައުމުތަކުން ވަނީ ރާއްޖެއަށް ޖުމްލަ 7,628 ފަތުރުވެރިން ޒިޔާރްތް ކޮށްފައެވެ.
