ކ. މާފުއްޓަށް އަރާ ފޭބުން މަނާކޮށްފިއެވެ.
އެރަށް އަރާ ފޭބުން މަނާކޮށްފައި މިވަނީ އެރަށު ގެސްޓްހައުސްއެއްގައި ޗުއްޓީ ހޭދަކުރަމުންދިޔަ ފަތުވެރިޔަކު މީހަކު ކޮވިޑް-19 އަށް ޕޮޒިޓިވްވުމާއި ގުޅިގެންނެވެ.
އެރަށުން ފެނުނު މިކޭސްއާއި ގުޅިގެން ސިއްހީގޮތުން އިތުރަށް ބަލަންޖެހޭ ކަންކަން ބެލުމަށް އެ ރަށް މޮނިޓަރިން އަށް ލާފައިވާކަން އެޗްޕީއޭއިންވެސްވަނީ އަންގާފައެވެ. މާފުށި މޮނިޓަރިން އަށް ލާފައި ވަނީ މިއަދު މެންދުރު ފަހު 15:43 އިން ފެށިގެންނެވެ.
އަދި މާފުށީގައި މިވަގުތު ތިބި އެއްވެސް މީހަކު ހެލްތު ޕްރޮޓެކްޝަން އެޖެންސީން ވަކިގޮތެއް އަންގަންދެން ރަށުން ފޭބުމާއި، އެޗްޕީއޭގެ ހުއްދަނެތި އެއްވެސް މީހަކު އެރަށަށް އެރުންވެސް ވަނީ މަނާކޮށްފައެވެ.
މާފުށިން އިތުރު ފަތުރުވެރިޔަކު ޕޮޒިޓިވްވެފައި މިވަނީ މާފުށީގައި އެކްޓިވް ކޭސްއެއް ނެތްކަމަށް އިއްޔެ އެރަށުގެ ސިއްހީ މަރުކަޒުން ބުނެފައިވަނިކޮށެވެ. މީގެކުރިން މާފުށިން 5 ފަތުރުވެރިއަކުވަނީ ކޮވިޑަށް ޕޮޒިޓިވްވެފައެވެ. އެއީ މިމަހުގެ 12 ވަނަ ދުވަހުއެވެ.
މަޢުލޫމާތު ލިބޭގޮތުގައި މާފުށިން މިއަދު ޕޮޒިޓިވްވި ފަތުރުވެރިޔާ ކޮވިޑަށް ޕޮޒިޓިވްވެފައިވަނީ އެރަށުގައި 27 ހޭދަކުރުމަށްފަހު ފުރަން ވެގެން ހެދި ކޮވިޑް-19ގެ ޓެސްޓުންނެވެ.
ކޮވިޑް ސަބަބުން ރައްކާތެރިކަމުގެ ފިޔަވަޅެއްގެގޮތުން ރާއްޖޭގެ ގެސްޓް ހައުސްތައް ބަންދުކޮށްފައިވަނީ މިދިޔަ މާޗް މަހުގެ 17 ވަނަ ދުވަހުއެވެ. އަދި ބޯޑަރު އަލުން ހުޅުވާލިފަހުން މީހުން ދިރިއުޅޭ ގެސްޓްހައުސްތައް ހުޅުވުމުގެ ހުއްދަ ޓޫރިޒަމް މިނިސްޓްރީން ދީފައިވަނީ މިދިޔަ އޮކްޓޯބަރުމަހުގެ 15 ވަނަ ދުވަހުއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާގޮތުން މިމަހުގެ 17 ވަނަ ދުވަހުގެ ނިޔަލަށް މީހުން ދިރިއުޅޭ 23 ރަށެއްގެ 94 ގެސްޓްހައުސްއެއް ހުޅުވުމުގެ ހުއްދަ ވަނީ ދީފައެވެ. މި 94 ގެސްޓްހައުސްއާއިއެކު ގެސްޓްހައުސް ސިނާއަތުގައި މިވަގުތު ރާއްޖޭގައި ފަތުރުވެރިންނަށް ޙިދުމަތްދެމުންދާ އެނދުގެ އަދަދަކީ 1986 އެކެވެ.
