މިއަހަރުގެ ފެބުރުވަރީ މަހުގެ ތެރޭގައި މާފުށީގައި ބިކިނީ ލައިގެން އުޅުނިކޮށް ފުލުހުން ހައްޔަރުރި ފަތުރުވެރިޔާ ހައްޔަރު ކޮށްފައިވަނީ ރަނގަޅަށް ކަމަށް ސަލާމަތީ ހިދުމަތްތަކާ ބެހޭ ކޮމެޓީއިން ނިންމައިފިއެވެ.
އެކޮމެޓީގެ ރިޕޯޓްގައި ވިދާޅުވެފައި ވަނީ ނިވާކަންކުޑަހެދުން ލައިގެން މާފުށީގައި އުޅުނު އަންހެން ފަތުރުވެރިޔާ ހައްޔަރު ކޮށްފައި ވަނީ ފަތުރުވެރިޔާ ހުރި އަތިރިމަތީގައި އެފަދަ ހެދުން ލައިގެން އުޅުން މަނާކަން އަންގައިދޭ ނިޝާން ހަރުކޮށްފައިވަނިކޮށް އަދި ރާއްޖޭގެ ޓޫރިސްޓު ގެސްޓްހައުސް ހިންގުމާބެހޭ ގަވާއިދުގައިވެސް އެފަދަ ހެދުން ލައިގެން އުޅުން މަނާކޮށްފައި ވަނިކޮށްކަމަށެވެ.
ކޮމެޓީގެ ރިޕޯޓްގައި ވިދާޅުވެފައި ވަނީ ފުލުހުން އެސަރަހައްދަށްގޮސް އޭނާއަށް ތަކުރާރުކޮށް ނަސޭހަތް ދިނުމުންވެސް އޭނާ ނިވާވުމަށް އިންކާރު ކުރިކަމަށާއި އޭގެ ބަދަލުގައި އެ ފަތުރުވެރިޔާ ވަނީ އެތަނަށްދިޔަ ފުލުހެއްގެ އައިނު އަތުލައި، އަދި އެތާހުރި އެހެން ފުލުހެއްގެ ކާޑުވެސް އަތުލުމަށް މަސައްކަތްކޮށްފައިކަމަށެވެ. އަދި އޭނާ ފުލުހުންގެ ނަޞޭހަތް ޤަބޫލު ނުކުރުމުން ފުލުހުންގެ ބެލުމުގެ ދަށަށް ގެންދަން އުޅުމުން ފުލުހެއްގެ އަތުގައި ދަތް އަޅާފައިވާކަންވެސް އެ ރިޕޯޓްގައި ވަނީ ފާހަގަ ކޮށްފައެވެ.
ފަތުރުވެރިޔާ ފުލުހުންގެ ބެލުމުގެ ދަށަށް ގެންގޮސްފައި ވަނީ އޭނާގެ ސަލާމަތަށް ކަމަށާއި އެގޮތުން އެ ސަރަހައްދުގައި ތިބި އާންމުންގެ ފަރާތުން އޭނާއަށް ލިބިދާނެ ގެއްލުމަކުން ސަލާމަތް ކުރުމަށްކަމުގައި ރިޕޯޓްގައި ވިދާޅުވެފައިވެއެވެ.
މި މައްސަލައާއި ގުޅިގެން ފުލުހުން އޭރު ނެރެފައިވާ ބަޔާނެއްގައި ވިދާޅުވެފައި ވަނީ މާފުށިން އެ އަންހެން ފަތުރުވެރިޔާ ހައްޔަރު ކުރަން ޖެހުނީ، މަސްތުގެ ހާލުގައި ނިވާކަން ކުޑަ ގޮތަކަށް އެ ރަށުތެރޭގައި އުޅެމުންދާ ކަމުގެ ޝަކުވާ ލިބިގެންކަމަށާއި، އަދި އާންމުން ދިރިއުޅޭ ހިސާބުތަކުގައި ފަތުރުވެރިން ބިކިނީގައި އުޅުމަކީ މަނާކަމެއްކަން، ފަތުރުވެރިޔާއަށް ވިސްނައިދޭން އެވަގުތު އެތަނަށް ދިޔަ ފުލުހުން މަސައްކަތް ކުރި ނަމަވެސް ނުކިޔަމަންތެރިކަން ދެއްކުމުން ބިޑި އަޅުވައިގެން ފުލުހުންގެ ބެލުމުގެ ދަށަށް އެފަތުރުވެރިޔާ ގެންނަށް ޖެހުނީކަމަށެވެ.
މި ފަތުރުވެރިޔާ ހައްޔަރުކުރުމުގައި ފުލުހުން އަމަލުކޮށްފައިވާ ގޮތް ބެލުމަށް ޕްރޮފެޝަނަލް ސްޓެންޑާޑްސް ކޮމާންޑުގެ ޓީމަކުން ވަނީ އެރަށުގައި ހަރަކާތްތެރިވެފައެވެ. އެ ޓީމުންވެސް ވަނީ ފަތުރުވެރިޔާ ހައްޔަރު ކޮށްފައިވަނީ ރަނގަޅަށް ކަމަށް ނިންމާފައެވެ.
