ކޮވިޑް-19 ޖެހިގެން ކ. މާފުށިންވެސް މީހަކު ނިޔާވެއްޖެއެވެ.
މިއީ ކޮވިޑް-19 ޖެހިގެން މިއަދު ނިޔާވި 3 ވަނަ މީހާއެވެ. މީގެ ކުރިން މިއަދު ވަނީ ބ. އޭދަފުށިންނާއި، އައިޖީއެމްއެޗް ހޮސްޕިޓަލުގައި އެޑްމިޓްކޮށްފައި އޮތް މީހަކުވެސް ކޮވިޑް ޖެހިގެން ނިޔާވެފައެވެ.
ހެލްތް ޕްރޮޓެކްޝަން އެޖެންސީ އިން ވިދާޅުވީ މިއަދުގެ ހެނދުނުގެ ވަގުތެއްގައި ކ. މާފުށިން ނިޔާވި އުމުރުން ދުވަސްވީ މީހަކު ކޮވިޑަށް ޕޮޒިޓިވް ވެފައިވާކަމަށާއި، އެގޮތުން މާފުށިން މިއަދު ނިޔާވެފައި ވަނީ އުމުރުން 74 އަހަރުގެ ފިރިހެނެއްކަމަށެވެ.
އެހެން ކަމުން ކޮވިޑް-19 ގައި ރާއްޖެއިން ނިޔާވި މީހުންގެ އަދަދު މިވަނީ 87 އަށް އަރާފައެވެ.
This morning a 74-year-old Maldivian male in K. Maafushi, declared dead at 09:45am, has tested positive to COVID19.
This is the 87th COVID-19 death in the Maldives.
Our thoughts and prayers are with the bereaved family. May Allah grant his soul eternal peace.
— Health Protection Agency (@HPA_MV) May 10, 2021
މާފުށީގައި ކޮވިޑް-19 ފެނުމާއި ގުޅިގެން އޭޕްރީލް 20 ވަނަ ދުވަހު އެރަށް ވަނީ މޮނިޓަރިންއަށްލާފައެވެ.
ކޮވިޑްޖެހިގެން މަރުވާ މީހުން ރާއްޖޭގައި އިތުރުވެފައިވާއިރު، މި ބައްޔަށް ޕޮޒިޓިވްވާ މީހުންގެ އަަދަދުވެސް ރާއްޖޭގައި މިހާރު އަންނަނީ މީގެ ކުރިން ދުވަހަކުވެސް ނާރާ ވަރަށް މައްޗަށް އަރަމުންނެވެ.
އެގޮތުން އިއްޔެވެސް 1091 މީހަކު މިބައްޔަށް ވަނީ ޕޮޒިޓިވް ވެފައެވެ. މިއީ މިހާތަނަށް އެންމެ ގިނަ މީހުން މި ބައްޔަށް ޕޮޒިޓިވް ވެފައިވާ ދުވަހެވެ.
ރާއްޖޭގައި މިހާތަނަށް 26،299 މީހަކަށް ވަނީ މިބަލި ޖެހިފައެވެ. އޭގެ ތެރެއިން 250 މީހުންނަށް އަންނަނީ ހޮސްޕިޓަލުގައި ފަރުވާ ދެމުންނެވެ.
