ފުލޫ ކުލިނިކަށް ދެއްކި މީހަކު ޕޮޒިޓިވް ވުމާއި ގުޅިގެން ކ. މާފުއްޓަށް އަރާފޭބުން މަނާކޮށްފިއެވެ.
މަފުށީ ކައުންސިލްގެ ރައީސް އުސްމާން ރަޝީދު މި ނޫހަށް ވިދާޅުވީ، ބަލީގެ އަލާމާތްތައް ހުރެގެން އެރަށުން ފުލޫ ކުލިނިކަށް ދެއްކި މީހަކު ކޮވިޑް-19 އަށް ޕޮޒިޓިވް ވެފައިވާ ކަމަށާއި، އެއާއި ގުޅިގެން މިއަދު އެރަށް މޮނިޓަރިންއަށް ލާފައިވާކަމަށެވެ.
އެމީހާ ފުލޫކުލިނިކަށް ދައްކާފައިވަނީ އިއްޔެއެވެ. އަދި އެމީހާގެ ކޮވިޑް ޓެސްޓްގެ ނަތީޖާ ލިބިފައިވަނީ މިއަދުއެވެ.
މާފުށިން މީހަކު ޕޮޒިޓިވް ވުމާއި ގުޅިގެން އެރަށް މޮނިޓަރިންގެ ހާލަތަށް ގެނެވި، ކޮންޓެކްޓް ޓްރޭސިންގެ މަސައްކަތްތައް ފެށުމަށް މިހާރު ދަނީ ތައްޔާރު ވަމުންކަމުގައި އުސްމާން ރަޝީދު ވިދާޅުވިއެވެ. އަދި މާފުށިން ރެންޑަމް ސާމްޕަލް ނެގުމަށް ހަމަޖެހިފައިވާކަމަށްވެސް އުސްމާން ވަނީ ވިދާޅުވެފައެވެ.
މާފުށިން ކޮވިޑް ފެނިފައިވާއިރު، އަތޮޅު ތެރޭގެ ގިނަ ރަށްތަކަކުން ވަނީ ކޮވިޑް ފެނިފައެވެ. އޭގެ ތެރެއިން މިހާރުވެސް ބައެއް ރަށްރަށުގައި ދަނީ މި ބަލި ފެތުރެމުންނެވެ. ކޮވިޑާއި ގުޅިގެން އަތޮޅު ތެރެއިން 17 ރަށެއް ވަނީ މޮނިޓަރިންއަށް ލައިފައެވެ.
އެޗްޕީއޭ އިން އެންމެ ފަހުން އާންމު ކޮށްފައިވާ މަޢުލޫމާތަށް ބަލާއިރު، ރާއްޖޭގައި މިހާތަނަށް 26،505 މީހަކަށް މިބަލި ޖެހިފައިވާއިރު، މި ބައްޔަށް މިހާރު ފަރުވާ ހޯދަމުން އަންނަނީ 22،735 މީހުންނެވެ. އޭގެ ތެރެއިން 68 މީހަކަށް ހޮސްޕިޓަލުގައި ފަރުވާދޭއިރު، ބަލީގައި މިހާތަނަށް 71 މީހަކު ވަނީ ނިޔާވެފައެވެ.
