ހަންގަނޑުގެ ފަރުވާތަކަށް ރީނދުލަކީ ދިވެހިންގެ މެދުގައި އަބަދުވެސް ބޭނުން ކުރަމުން އައި ގުދުރަތީ ބާވަތަކެވެ. ރީނދުލަކީ ހަންގަނޑަށް ވަރަށް ބޭނުންތެރި މާއްދާތަކެއް އެކުލެވޭ އެއްޗެކެވެ. އެގޮތުން ހަންގަނޑުގެ އުޖާލާކަން އިތުރުވެ ހަންފޮޅުން ހުއްޓި އަދި ހަންގަނޑުގެ ކުލަ އަލި ކުރުމަށް ރީނދުލަކީ ވަރަށް ބޭނުންހިފޭނެ އެއްޗެކެވެ.
ރީނދުލަކީ އޭގައި ވަރަށް ގިނައިން އެންޓިއޮކްސިޑެންޓް ހިމެނޭ އެއްޗެކެވެ. އެގޮތުން މަރުވެފައި ހުންނަށް ސެލްތައް ނައްތާލާ، ހަމުގައި ލަށްޖެހުން އަދި ބިހިނެގުމުން ރައްކާތެރިކޮށްދިނުމަށް ރީނދޫ އެހީތެރިވެދެއެވެ.
ހާއްސަކޮށް ނާޒުކު ހަންގަނޑުތަކަށް ގުދުރަތީ ބާވަތްތައް ބޭނުންކުރުން މުހިއްމުއިރު، ރީނދުލަކީ މިފަދަ ހަންގަނޑަކަށް ވަރަށް ފައިދާކުރުވާނެ އެއްޗެކެވެ. އެގޮތުން ރީނދޫ ބޭނުންކޮށްގެން އެކި މީހުން އެކި ކަހަލަ ފޭސް މާސްކް ހަދާއުޅޭއިރު، މި ބުނެދެނީ ނާޒުކު ހަންގަނޑުތަކަށް ހާއްސަ ރީނދޫ ފޭސް މާސްކެކެވެ.
ގޭގައި ވަރަށް ފަސޭހައިން ތައްޔާރުކޮށްލެވޭނެ މި ފޭސްމާސްކް ހެދުމަށް ބޭނުންވާ ބާވަތްތަކަކީ އެއް ސައިސަމުސާ ރީނދޫ ޕައުޑަރގެ އިތުރުން، 1 ސައިސަމުސާ އެލޯވެރާ ޖެލް އާއި އަދި ރޯސް ވޯޓާ ފޮދެކެވެ.
މި ހުރިހާ ބާވަތްތައް ކުޑަ ތައްޓަކަށް އެޅުމަށްފަހު ރަނގަޅަށް އެއްކުރާށެވެ. އަދި މޫނު ސާފުކުރުމަށްފަހު މި ޕޭސްޓް މޫނުގައި އުނގުޅާފައި 10 ނުވަތަ 15 މިނެޓް ވަންދެން ބަހައްޓާށެވެ.
