2018 ވަނަ އަހަރުގެ އޭޕްރީލް މަހު މުޅި ދުނިޔެ ސިއްސުވާލީ، ކަޝްމީރުގެ ފައްޅިއެއްގެ ތެރޭގައި މުސްލިމު ތުއްތު އަންހެން ކުއްޖަކު ކިޑްނެޕްކޮށް، އެތައް ފަހަރެއްގެ މަތިން އެކުއްޖާ ރޭޕްކޮށް އަދި އޭގެފަހުން އެކުއްޖާ މަރާލި ޙަބަރެވެ.

8 އަހަރުގެ އާސިފާ ބަނޯ ރޭޕްކޮށް މަރާލި ކަމަށް ތުހުމަތުކުރެވުނު އަށް މީހަކު މައްޗަށް ތުހުމަތު ކުރެވިފައިވާއިރު، އޭގެތެރެއިން އާސިފާ ރޭޕްކޮށް މަރާލިކަމަށް ސާބިތުވި ތިން މީހުންނަށް މަރުގެ އަދަބު ނުދީ އުމުރު ދުވަހުގެ ޖަލުގެ ހުކުމް މިއަދު ތަންފީޒުކޮށްފިއެވެ. އަދި ރިޝްވަތުގާ ހިފާ މި ހާދިސާއާ ގުޅޭ ސާބިތު ހެކިތައް ނައްތާލިކަމުގެ ތުހުމަތު ކުރެވި، ސާބިތުވެފައިވާ 3 ފުލުހުންނަށް ވަނީ 5 އަހަރުގެ ޖަލުގެ ހުކުމް ކޮށްފައެވެ.

އާސިފާ ބަނޯ ރޭޕް ކޮށް މަރާލިކަމަށް އިންޑިއާގެ ހަ މީހެއްގެ މައްޗަށް ސާބިތުވާކަމަށް އިންޑިއާގެ ކޯޓަކުން ހުކުމްކޮށްފައިވާއިރު، މި ހާދިސާގައި ޖުމްލަ އަށް މީހަކަށް ވަނީ ތުހުމަތުކޮށްފައެވެ.

އެގޮތުން މި ހާދިސާގައި ފައްޅީގެ ވެރިޔަކާއި، 4 ފުލުސް އޮފިސަރުންނާއި، ކުޑަކުއްޖަކާއި އަދި ސަރުކާރަށް ހިދުމަތްކުރާ މީހެއްގެ މައްޗަށް ތުހުމަތު ކުރެވިފައިވެއެވެ. އަދި ތުއްތު އަންހެން ކުއްޖާ ރޭޕްކޮށް މަރާލުމުގެ ކުށުމުގެ ތުހުމަތުގައި ފުލުހުން ހައްޔަރު ކޮށްފައިވާ އަށް މީހުންނަކީ މުޅީންވެސް ހިންދޫންނެވެ.

ބޭރުގެ ޙަބަރުތައް ބުނާގޮތުން، އަސީފާ ރޭޕްކޮށް މަރާލުމުގައި ބައިވެރިވިކަމަށް ތުހުމަތު ކުރެވުނު 7 ވަނަ މީހާގެ މައްޗަށް ކުށް ސާބިތުނުވެ ދޫކޮށްލައިފައިވާއިރު، ތުހުމަތުކުރެވުނު ކުޑަކުއްޖާއަށް ޝަރީއަތް ހިނގުމަށް ހަމަޖެހިފައިވަނީ ވަކިންނެވެ.

އާސިފާ ރޭޕްކޮށް މަރާލިކަމަށް ސާބިތުވެ އުމުރު ދުވަހުގެ ޖަލު ހުކުމް ކޮށްފައިވާ ތިން މީހުންގެ ތެރޭގައި ހިމެނޭ 2 މީހުންނަކީ، ސަރުކާރުގެ ޚިދުމަތުން ރިޓަޔަރ ކޮށްފައިވާ "ސަންޖީ ރާމް" އަދި ޕޮލިސް އޮފިސަރެއްކަމުގައިވާ "ދީޕަކް ހަޖޫރިއާ" އެވެ.

ކަޝްމީރުގެ ސިޓީއެއް ކަމަށްވާ ކަތުއާ އަށް ނިސްބަތްވާ އާސިފާ ބާނޯ މަރާލާފައި އޮއްވާ ފެނިފައި ވަނީ މިދިޔަ އަހަރުގެ ޖެނުއަރީ މަހު 17 ވަނަ ދުވަހު އެވެ. ނަމަވެސް އެ މައްސަލަ ނޫސްތަކުގެ ސަމާލުކަމަށް އައިސްފައި މިދިޔަ އަހަރުގެ އޭޕްރީލް މަހުއެވެ.

މި ހާދިސާ ހިނގައިފައިވާ ގޮތައް ބަލާއިރު، އަސިފާ ވަގަށް ނަގައިގެން ކަޝްމީރުގެ ކަތުއާ ސިޓީއަށް ގެންގޮސްފައިވަނީ 2018 ވަނަ އަހަރުގެ 10 ވަނަ ދުވަހުއެވެ. އަދި އޭގެފަހުން 5 ދުވަސްވަންދެން ކުއްޖާ ފޮރުވައިގެން ގެންގުޅުނުއިރު، ތިންދުވަސް ވަންދެން އެމީހުން ކުއްޖާ ގެންގުޅުނީ ފައްޅީގެތެރޭގައެވެ.

އެދުވަސްތަކުގެ ތެރޭގައި ތަކުރާރުކޮށް އެތައްފަހަރެއްގެ މަތިން އެކުއްޖާ ރޭޕްކޮށްފައިވާއިރު، އެންމެ ފަހުން ކަރުގައި ހިފައި އަދި ގަލަކުން ތަޅައި އެކުއްޖާ ވަނީ މަރާލާފައެވެ. އެކުއްޖާ މަރާލުމުގެ ކުރިން އެތައްފަހަރެއްގެ މަތިން އެކުއްޖާ ރޭޕްކޮށްފައިވާކަން ވަނީ ފޮރެންސިކް ތަހުޤީގު ރިޕޯޓުތަކުން ސާބިތުވެފައެވެ.

މަރާލުމަށްފަހު އެމީހުން އާސިފާގެ ހަށިގަނޑު އެއްލާލާފައިވަނީ، އޭނާ ބަންދުކޮށްގެން ގެންގުޅުނު ފައްޅި ކައިރިން ޖަންގަލި ތެރެއަށެވެ.

ޖައްމޫ އެންޑް ކަޝްމީރަކީ އިންޑިއާގައި މުސްލިމުންގެ އަޣުލަބިއްޔަތު އޮންނަ ހަމައެކަނި ސްޓޭޓް ނަމަވެސް، ތުއްތު ކުއްޖާ ރޭޕްކުރުމުގެ ޖަރީމާ ހިންގި ޖައްމޫ ސަރަހައްދަކީ ހިންދޫގެ އަޣުލަބިއްޔަތު އޮންނަ ސަރަހައްދެކެވެ.