ދިވެހި ރުފިޔާއަށް ޚާއްސަ ނިޝާނެއް ބޭނުންކުރަން ފެށުމަށް ނިންމައި، އެނިޝާން ފަރުމާކުރުމަށް ޝައުގުވެރިވާ ފަރާތްތަކަށް އެފުރުސަތު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހުޅުވާލައިފިއެވެ.
އެމްއެމްއޭއިން ވިދާޅުވީ، މިމުބާރާތުގައި ބައިވެރިވާން ބޭނުންވާ ފަރާތްތަކުން އަންނަ މަހުގެ 21 ގެ ކުރިން ޕްރޮޕޯސަލް ހުށަހެޅުމުގެ ފުރުސަތު ހުޅުވާލެވިފައިވާކަމަށާއި، ހުށަހަޅާ ހުށަހެޅުންތަކުގެ ތެރެއިން އެންމެ މޮޅު ހުށަހެޅުމަކަށް 20000 ރުފިޔާގެ އިނާމެއް ދިނުމަށް ހަމަޖެހިފައިވާކަމަށެވެ.
އަދި މިއީ މުޅިން އަލަށް ކުރެވޭ ވަރަށް ތާރީޚީ ކަމެއްކަމަށާއި، މިޝަރަފު ހޯދުމުގެ ފުރުޞަތު ހުރިހާ ފަރާތްތަކަށްވެސް ހުޅުވާލެވިފައިވާކަމަށް އެމްއެމްއޭއިން ވިދާޅުވިއެވެ.
Currency Symbol Designing Competition – A historic opportunity to design the symbol to be used for Maldivian Rufiyaa.
RFP: https://t.co/mbGABlpMOj pic.twitter.com/mXf705h7cl— MMA (@MMA_Maldives) January 24, 2021
އެގޮތުން ކޮންމެ ފަރާތަކަށްވެސް ހުށަހެޅޭނީ 1 ޕްރޮޕޯސަލް ކަމަށާއި ފަރުމާކުރާ ނިޝާނަކީ ކަނާތުން ވައަތަށް އަދި ވައަތުން ކަނާތަށް ލިޔާ ބަސްތަކުގައި ވެސް ބޭނުންކުރެވޭ ފަދަ ނިޝާނަކަށް ވާންވާނެކަމަށް އެމްއެމްއޭއިން ހާމަކުރެއެވެ.
މިއީ ލިޔުމުގައި ފައިސާގެ ނަން ލިޔުމުގެ ބަދަލުގައި ބޭނުންކުރާ ނިޝާނެކެވެ.
ފަނޑިޔާރުން ޕްރޮޕޯސަލްތައް އިންސާފުކުރުމުގައި ބަލާނެ ބައެއް ކަންތައްތަކުގެތެރޭގައި ފަރުމާކޮށްފައިވާ ޑިޒައިނުން ދިވެހިރާއްޖެ ނުވަތަ ދިވެހި ރުފިޔާ ރަމްޒުކޮށްދޭ މިންވަރާއި، ތަފާތު ފޮންޓްތަކާއި ފޮންޓް ސްޓައިލްތަކާ އެކު ނިޝާން ބޭނުންކުރުމަށް އެކަށީގެންވާ މިންވަރު ނަންބަރުތަކާއި ލިޔުމުގައި ބޭނުންކުރާ އެހެނިހެން ކެރެކްޓަރތަކާ އެކު ބޭނުންކުރުމަށް އެކަށީގެންވާ މިންވަރުގެ އިތުރުން އެހެން ޤައުމުތަކުގެ ފައިސާގެ ނިޝާންތަކުގައި ބޭނުންކޮށްފައިވާ ހަމަތަކަށް ފެތޭ މިންވަރު ހިމެނެއެވެ.
ޕްރޮޕޯސަލްގައި ހުށަހަޅަންޖެހޭ ތަކެތި:
- ހުށަހަޅާ ޑިޒައިނުން ދިވެހި ރުފިޔާ ރަމްޒުކޮށްދީފައިވާ ގޮތުގެ ކުރު ޚުލާސާއެއް (ކޮންސެޕްޓް)
- ޕްރޮޕޯސަލް ހުށަހަޅާ ފަރާތުން ފުރިހަމަކޮށްފައިވާ ޕްރޮޕޯސަލް ފޯމް އަދި އިޤުރާރު ފޯމް
- އެއްފަރާތަށްވުރެ ގިނަ ފަރާތްތަކުން އެއް ޕްރޮޕޯސަލް ހުށަހަޅާ ނަމަ، ކޮންމެ ފަރާތެއް ވެސް ވަކިން ފުރިހަމަކޮށްފައިވާ "އިޤުރާރު ފޯމް" އަދި އެޓޭޗްމަންޓް ފޯމް(ތައް)
ދިވެހި ފައިސާއަށް ވަކި ނިޝާނެއް މިހާތަނަށް ހަދާފައިނުވާއިރު، ދިވެހިން ލިޔާއިރު ފައިސާގެ އަދަދާއެކު "ރ" މިއަކުރު ބޭނުންކުރެއެވެ.
