ކޮވިޑް-19 އިން ރައްކާތެރިވުމަށް އަޅާފައިވާ ޚާއްޞަ ފިޔަވަޅުތަކުގެ ދަށުން ފިހާރަތައް ހުޅުވާފައި ބެހެއްޓޭ ގަޑި ކުޑަކޮށްފިއެވެ.
އިކޮނޮމިކް މިނިސްޓްރީން މިއަދު ނެރުނު އިއުލާނެއްގައި ވިދާޅުވީ، 03 ފެބްރުއަރީ 2021 އިން ފެށިގެން، ފިހާރަތައް ހުޅުވާފައި ބެހެއްޓޭނެ ގަޑިއަކީ ފަތިހު 5:00 އިން ރޭގަނޑު 10:30 އަށް ކަމަށެވެ.
މިެގ އިތުރުން، ކަސްޓަމަރުންނަށް ހުޅުވާލައިގެން، ވިޔަފާރިކުރާ ފިހާރަފަދަ ތަންތަނުން ހެލްތް ޕްރޮޓެކްޝަން އެޖެންސީން ކަނޑައަޅާ އުޞޫލުތަކާއި އެއްގޮތަށް ޢަމަލުކުރަން ވާނެ ކަމަށް މިނިސްޓްރީން ވިދާޅުވިއެވެ.
ކޮވިޑް-19 ލޮކްޑައުންގައި ފިހާރަތައް ބަންދުކޮށް އަލުން ހުޅުވުމަށްފަހު ފިހާރަތައް ހުޅުވާފައި ބެހެއްޓޭ ގަޑިއަށް އެންމެ ފަހުން ބަދަލު ގެނެސްފައިވަނީ، 8 ނޮވެމްބަރު 2020 ގައެވެ. އެގޮތުން އެދުވަހުން ފެށިގެން މިއަދާއި ހަމައަށް ފިހާރައް ހުޅުވާފައި ބެހެއްޓޭ ގަޑިއަކީ، ރޭގަނޑު 11:00 އެވެ.
ރާއްޖޭގައި ކޮވިޑް-19 ގެ ކޭސްތައް ފަހަކަށް އައިސް އިތުރުވެ، ހާލަތު ގޯސްވަމުން އަންނާތީވެ، އެޗްޕީއޭ އިން އިއްޔެ ވަނީ ކޮވިޑްގެ ފިޔަވަޅުތައް އިތުރަށް ވަރުގަދަކޮށްފައެވެެ.
އެގޮތުން އިތުރަށް ހަރުކަށި ކުރި ކޮވިޑް ފިޔަވަޅުތަކުގެ ތެރޭގައި،
- ރޭގަނޑު 8:30 އިން ފެށިގެން ފަތިހު 4:30 އަށް އެއްގަމު އުޅަނދު ދުއްވުން މަނާ
- ރޭގަނޑު 11 އިން ފެށިގެން ފަތިހު 4:30 އަށް ކާފިއު ހިންގުން
- ކުޅިވަރު ހަރަކާތްތަކާއި ޓީމު ހަރަކާތްތައް ހުއްޓާލުން
- ޕާކުތަކާއި މައިދާންތަކަށް މީހުން ޒިޔާރަތް ކުރުން ހުއްޓާލުން
- ޔުނިވާސިޓީ/ ކޮލެޖްތަކުގައި އޮންލައިންކޮށް ކިޔަވައިދިނުން
- ޕްރީ ސްކޫލްތަކާއި ޑޭކެއާ ސެންޓަރުތައް ބަންދު ކުރުން
ރޭ ބޭއްވި ނޫސްވެރިންގެ ބައްދަލުވުމުގައި އެޗްޕީއޭ އިން ވަނީ މި ފިޔަވަޅިތައް އިތުރަށް ވަރުގަދަކޮށް، އެކަމާއި ގުޅޭގޮތުން ވާހަކަދައްކާފައެވެ.
