ތ. ތިމަރަފުށީގައި ހަރުކަށި ފިކުރުގެ އަމަލު ހިންގަން އުޅުނު ކަމުގެ ތުހުމަތުގައި ހައްޔަރުކުރި މީހުންނަށް ދައުވާކުރުމަށް ކްރިމިނަލް ކޯޓަށް ހުށަހަޅައިފިއެވެ.

ޕްރޮސެކިއުޓާ ޖެނެރަލް ހުސެއިން ޝަމީމް، އެބޭފުޅާގެ ބްލޮގްގައި ލިޔުއްވާފައިވަނީ، މި މައްސަލަ ދިރާސާކޮށް އިއްޔެ ކޯޓަށް ހުށައަޅާފައިވާ ކަމަށެވެ.

ޝަމީމްގެ ބްލޮގްގައި ލިޔުއްވާފައިވާ ގޮތުގައި ޖިނާއީ ޢަދުލުގެ ނިޒާމުގެ ބޭނުމަކީ، މީހުންގެ ސަލާމަތާއި ރައްކާތެރިކަން ކަށަވަރު ކުރުން ކަމަށާއި ދީނީ ނުވަތަ އެނޫންވެސް ފަލްސަފީ ވިސްނުމެއްގެ ތެރެއިން، ހަރުކަށިކަމާއި އަނިޔާވެރިކަން އަންނަނަމަ، އެކަމަށް ޖިނާއީ ޢަދުލުގެ ނިޒާމުން ފިޔަވަޅު އަޅައި، ޙައްލުކުރަންޖެހޭނެ ކަމަށެވެ.

މި މައްސަލައިގައި އަށް މީހެއްގެ މައްޗަށް ދައުވާ ކުރުމަށް، މިދިޔަ މަހުގެ 25 ވަނަ ދުވަހު ވަނީ ފޮނުވާފައެވެ.

ހައްޔަރުކޮށް ދައުވާކުރަން ފޮނުވި މީހުން:

• އަބްދުﷲ ޝަރީފް، ތ. ތިމަރަފުށި/ފެހިވިދުވަރު، (34އ.)
• އަހްސަން މުހައްމަދު، ތ. ތިމަރަފުށި/ކެނެރީގެ (32އ.)
• އަލީ މުނީޒު، ތ.ތިމަރަފުށި/ކެނެރީގެ (28އ.)
• މުހައްމަދު އާސިރު، ތ. ތިމަރަފުށި/އަސުރުމާގެ (34އ.)
• އަލީ އަރުހަމް މުހައްމަދު، ރ. ކަނދޮޅުދޫ/ފެހިވިލާ (18އ.)
• ޝަމާހް ޝަރީފް، ތ. ތިމަރަފުށި/ސައިމާ (20އ.)
• އިބްރާހިމް ލޫތު، ނ.ކުޑަފަރި/ރޯޒްމީޑް (21އ.)
• އަބްދުﷲ އިމާދު، ރ. މަޑުއްވަރި/ބީޗް ހައުސް (29އ.)

ފުލުހުން މީގެކުރިން ވިދާޅުވެފައިވަނީ މި އެންމެނަކީވެސް ހަރުކަށި ފިކުރުގެ މީހުންނާއި ޓެރަރިސްޓް ޖަމާއަތެއްކަމަށްވާ އައިސިސް އާއި ގުޅުން އޮންނަ ބައެއްކަމަށެވެ.

ނިރުބަވެރި އަމަލުތަކެއް ހިންގަން ރާވަމުންދާ ކަމުގެ ތުހުމަތަށް މިދިޔަ އަހަރުގެ ނޮވެމްބަރު މަހު ތެރޭ އޮޕަރޭޝަނެއް ހިންގައި އެންމެ ފުރަތަމަ ބަޔަކު ހައްޔަރުކުރީ މާލެ ކައިރީގައި އޮތް "ނަސާހް 3" ކިޔާ ދޯންޏަކުންނެވެ. ފުލުހުން ވިދާޅުވެފައިވަނީ އެ ދޯނީގައި އިމްޕްރޮވައިސްޑް އެކްސްޕްލޯސިވް ޑިވައިސް (އައި.އީ.ޑީ)އެއް ހަދަން މަސައްކަތްކުރާ ކަމުގެ މައުލޫމާތު ލިބުނު އިރު އެކަމަށް ބޭނުންކުރާ ބައެއް ސާމާނު ވެސް ދޯނިން ފެނިފައިވާކަމަށެވެ. އެގޮތުން ދޯނި އަޅާފައި އޮތް ސަރަޙައްދުގެ 10 މީޓަރު މޫދު އަޑިން ބަޑިބޭސް އެކުލެވޭކަމަށް ބެލެވޭ ކާޓްރިޖްތަކެއް ވެސް ފުލުހުންނަށް ވަނީ ފެނިފައެވެ.

އައިއެސްއާ ގުޅިގެން އެ ޖަމާއަތުގެ އިރުޝާދުގެ ދަށުން ރާއްޖޭގައި ޓެރަރިޒަމްގެ އަމަލްތައް ހިންގުމަށް ހިތްވަރުދީ ރާވަމުން ދިޔަ މީހުންނަކީ ދަތުރު ދިއުމުގެ ނަމުގައި ފަޅުރަށްރަށަށްގޮސް ތަމްރީނުތައް ހަދައި ދީނުގެ ނަމުގައި ހަރުކަށި ފިކުރު ފެތުރުމުގެގޮތުން ރަށުގެ ބައެއް ގޭގޭގައި ހަރުކަށި ފިކުރުގެ ކްލާސްތައް ހިންގައި އޮންލައިންކޮށް ހަރުކަށި ފިކުރުގެ ދަރުސްތައް ބާއްވައި ކުޑަކުދިންނަށް އަމާޒުކޮށްގެން އެ ކުދިން ހަރުކަށި ފިކުރަށް ލެންބުމަށް މަސައްކަތްކުރާ ބައެއް ކަމަށް ވެސް މީގެ ކުރިން ފުލުހުން ވިދާޅުވެފައިވެއެވެ.