އެންޓިކޮރަޕްޝަން ކޮމިޝަން (އޭސީސީ) އިން މިިދިޔަ އަހަރު 961 މައްސަލަ ބަލާ ނިންމައި، ދަޢުވާ ކުރުމަށްޓަކައި ޕްރޮސިކިއުޓަރ ޖެނެރަލްގެ އޮފީހަށް
15 މައްސަލައެއް ފޮނުވާފައިވާނެކަމަށް އެ ކޮމިޝަނުން ބުނެފިއެވެ.
އެ ކޮމިޝަނުން އާންމު ކުރި 2020 ވަނަ އަހަރުގެ އަހަރީ ރިޕޯޓުގައި ބުނީ، 2020 ވަނަ އަހަރު ކޮމިޝަނަށް ހުށަހެޅިފައިވާ މައްސަލަތަކުގެ ތެރޭގައި އެ ކޮމިޝަނުން އިސްނަގައިގެން ބަލަން ކަނޑައެޅި 82 މައްސަލައަކާއި، ކޮމިޝަނުގައި ރަޖިސްޓްރީ ކުރި 856 މައްސަލައަކާއެކު، ޖުމްލަ 938 މައްސަލަ ކޮމިޝަނުގައި ރަޖިސްޓްރީ ކުރެވިފައިވާކަމަށެވެ.
އަދި ބުނީ ފާއިތުވި އަހަރު އެ ކޮމިޝަނުން 961 މައްސަލައެއް ބަލައި ނިންމާފައިވާއިރު، މިއީ 2019 ވަނަ އަހަރާ އަޅާބަލާއިރު 35 އިންސައިތަ އިތުރު އަދަދެއްކަމަށެވެ. އަދި 2020 ވަނަ އަހަރު ދަޢުވާ ކުރުމަށްޓަކައި ޕްރޮސިކިއުޓަރ ޖެނެރަލްގެ އޮފީހަށް 15 މައްސަލައެއް ފޮނުވާފައިވާއިރު، މިއީ ފާއިތުވި ތިންއަހަރުތެރޭ ކޮމިޝަނުން ދަޢުވާ ކުރުމަށް ޕްރޮސިކިއުޓަރ ޖެނެރަލްގެ އޮފީހަށް ފޮނުވި އެންމެ ގިނައަދަދުކަމަށްވެސް އޭސީސީ އިން ބުނެއެވެ.
އެ މައްސަލަތަކުގެ ތެރޭގައި ތަޙުޤީޤު އެހެން އިދާރާތަކާ ގުޅިގެން ހިންގި ޖޮއިންޓް އިންވެސްޓިގޭޝަންތަކުން ދަޢުވާ ކުރުމަށް ފޮނުވި 4 މައްސަލައެއްވެސް ހިމެނޭއިރު، ދައުވާކުރުމަށް ފޮނުވި މައްސަލަތަކުގެ ތެރޭގައި އެންމެ ގިނައީ، ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ މައްސަލަކަންވެސް އޭސީސީގެ އަހަރީ ރިޕޯރޓުން އެނގެން އޮވެއެވެ.
އަދި ތަހުގީގާއި ދިރާސާ ކަރުދާސްތަކަށްފަހު އިދާރާތަކަށް އިސްލާހުކުރުމަށް 341 އެންގުމެއް މިދިޔަ އަހަރު އޭސީސީ އިން އެންގި ކަމަށާއި ޖުމްލަ 29.1 މިލިއަން ރުފިޔާ ދައުލަތަށް އަނބުރާ ހޯދުމަށް ކަމާބެހޭ އިދާރާތަކަށް އެންގި ކަމަށް ބުނެފައިވެއެވެ. އަދި ހަމައެހެންމެ، 29,158,155.91 (ނަވާވީސް މިލިއަން އެއްލައްކަ ފަންސާސް އަށްހާސް އެއްސަތޭކް ފަންސާސް ފަސް ރުފިޔާ ނުވަދިހަ އެއްލާރި) ދައުލަތަށް އަނބުރާ ހޯދުމަށްޓަކައި ކަމާބެހޭ އިދާރާތަކަށް އަންގާފައިވާނެކަމަށްވެސް އޭސީސީއިން ބުނެއެވެ.
މީގެއިތުރުން އޭސީސީއިން ބުނީ، ކޮރަޕްޝަނާ ދެކޮޅަށް ހޭލުންތެރިކުރުމުގެ މަސައްކަތްތަކުގެ ދަށުން، 2020 ވަނަ އަހަރުގެ ތެރޭގައި، ހޭލުންތެރިކުރުމުގެ 41 ސެޝަނެއްގައި 1442 މީހަކަށް ކޮމިޝަނުން މަޢުލޫމާތު ދީފައިވާނެކަމަށެވެ. އަދި ރިސްކް އެސެސްމެންޓް ހުދު ކަރުދާސް އަދި ގައިޑްލައިން ގެ މަސައްކަތްތަކުގެ ތެރެއިން 6 ކަރުދާހެއްގެ މަސައްކަތް އެ ކޮމިޝަނުން ކޮށްފައިވާއިރު، އޭގެތެރެއިން 3 ކަރުދާހެއް މިދިޔަ އަހަރު ތެރޭގައި ޝާއިޢުކޮށްފައިވާނެކަމަށެވެ.
