ކ. މާފުށީގައި މަދިރި މަދުކުރުމަށް ހަރަކާތެއް ހިންގައިފިއެވެ.
މިހަރަކާތް ހިންގާފައި ވަނީ އެރަށު ސިއްޙީ މަރުކަޒުން އިސްނަގައިގެން މާފުށީ ކައުންސިލްގެ އެހީތެރިކަމާއެކުގައެވެ. އެރަށުގައި މަދިރި މަދުކުރުމަށް ހިންގި މި ހަރަކާތުގައި މޯލްޑިވްސް ކަރެކްޝަނަލް ސަރވިސްގެ އޮފިސަރުން ވެސް ވަނީ ބައިވެރިވެފައެވެ.
މިދިޔަ ބުރާސްފަތި ދުވަހު ކުރިއަށް ދިޔަ މި ހަރަކާތުގައި، މަދިރި މަދުކުރުމުގެ ގޮތުން ތަންތަން ސާފުކުރުމާއި މަދިރި އާލާވާ ތަންތަން ނައްތާލުމާއި ފެންގަނޑު ހެދޭ ތަންނަށް ފަސް އެޅުމުގެ މަސައްކަތް ވަނީ ކުރިއަށް ގެންގޮސްފައެވެ.
ކަރެކްޝަންސް އިން ވިދާޅުވީ މި މަސައްކަތުގައި މާފުށީ ޖަލުގައި މަސައްކަތްކުރާ ގިނަ އޮފިސަރުންނާއި އިންސްޓްޓިއުޓް ފޯރ ކަރެކްޝަނަލް ސްޓަޑީޒްގެ އޮފިސަރުންވެސް ބައިވެރިވެފައިވާކަމަށެވެ.
މީގެ އިތުރުން މި ހަރަކާތުގައި އެރަށުގައި ހަރަކާތްތެރިވާ ސަރުކާރުގެ އެކި މުއައްސަސާތަކުގައި މަސައްކަތްކުރާ ފަރާތްތަކާއި އަމިއްލަ ކުންފުނިތަކުގެ މެންބަރުންގެ އިތުރުން އާންމު ރައްޔިތުންވެސް ވަނީ ބައިވެރި ވެފައެވެ.
