ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް މިރޭ ޤައުމާ މުޚާތަބު ކުރައްވާނެއެވެ.
ރައީސުލްޖުމްހޫރިއްޔާގެ އޮފީހުން ވިދާޅުވެފައި ވަނީ ރައީސުލްޖުމްހޫރިއްޔާ ޤައުމާ މުޚާތަބު ކުރައްވަން ހަމަޖެހިފައި ވަނީ މިރޭ 7:00 ގައިކަމަށެވެ. ރައީސުލްޖުމްހޫރިއްޔާ ޤައުމާ މުޚާބަތު ކުރައްވާއިރު، ޓީވީ މެދުވެރިކޮށް ވަގުތުން ދެއްކުމަށް ވަނީ ހަމަޖެހިފައެވެ.
ރައީސް މިރޭ ޤައުމާ މުޚާތަބު ކުރައްވަނީ ކޮންކަމަކާ ގުޅިގެންކަމެއް ހާމަ ކުރައްވާފައެއް ނުވެއެވެ.
President @ibusolih will address the nation at 7 p.m.
The address will be broadcast live on all local TV stations.
— The President's Office (@presidencymv) May 12, 2021
ނަމަވެސް މާދަމާއަކީ 1442 ވަނަ އަހަރުގެ ފިޠުރު ޢީދު ދުވަހެވެ. އެހެން ކަމުން ރައީސް މިރޭ ޤައުމާ މުޚާތަބު ކުރައްވަނީ ރައްޔިތުންނަށް ޢީދު ތަޙްނިޔާ އަރިސްކުރެްވުމަށްކަމަށް ވުންވެސް އެކަށީގެންވެއެވެ.
މީގެ އިތުުރުން މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެންޕީއާރުސީ) ބޭނުންކޮށްގެން ކޮރަޕްޝަނާއި ޚިޔާނާތް ހިންގާފައިވާކަމަށް ތުހުމަތު ކުރެވޭ ފަރާތްތަކުގެ ލިސްޓްވެސް ރައްޔިތުންގެ މަޖިލީހުން މިއަދު ވަނީ އާންމުކޮށްފައެވެ.
މި ލިސްޓްގައި ދަޢުލަތުގެ މަޤާމްތަށް ފުރުއްވަމުން އަންނަ އަދި ދަޢުލަތުގެ މަޤާމްތައް ފުރުއްވި 119 ފަރާތެއްވެސް ހިމެނެއެވެ. އޭގެ ތެރޭގައި ކުރިގެ ރައީސް ޢަބްދުﷲ ޔާމިންއާއި، މިހާރުގެ މަޖްލިސް މެންބަރުންނާއި މިނިސްޓަރުންނާއި ފަނޑިޔާރުންގެ އިތުރުން އެމްއެންޑީއެފްއާއި ފުލުހުންނާއި، ދަޢުލަތުގެ އެކިއެކި މަޤާމްތަކުގައި އުޅުއްވި ފަރާތްތައް ހިމެނެއެވެ.
ހަމައެހެންމެ ކޮވިޑް-19 ގެ ހާލަތު މިހާތަނަށް ނުދާވަރަށް މައްޗަށް ގޮސް ޕޮޒިޓިވް ވާ މީހުންގެ އަދަދުވެސް ވަނީ ހާހުން މައްޗަށް އަރާފައެވެ. އެހެން ކަމުން ރައީސް ޤައުމާ މުޚާތަބު ކުރެއްވުމުގައި މިކަމާ ގުޅޭ ގޮތުން ވާހަކަ ފުޅު ދެއްކެވުންވެސް އެކަށީގެންވެއެވެ.
