ކޮވިޑް-19 ފެތުރުން ކޮންޓްރޯލް ކުރުމަށް ޕޯޗުގަލްގައި ރޭގަނޑުގެ ވަގުތު އަނެއްކާވެސް ކާފިއު އިއުލާން ކޮށްފިއެވެ.
ލިސްބަން ހިމެނޭގޮތުން 45 މުނިސިޕަލިޓީއެއްގައި ރޭގަނޑުގެ ވަގުތު ބޭރަށް ނިކުމެ އުޅުން މިއަދު މަނާކޮށްފައިވައިނީ 23:00 އިން ފަތިހު 5:00 އަށެވެ.
މީގެއިތުރުން ހަފްތާ ބަންދުގައި ކެފޭ އަދި ރެސްޓޯރެންޓުތައް ހަވީރު 3:30 ގައި ބަންދުކުރުމަށް ނިންމައިފައިވާއިރު އެނޫން ދުވަސްދުވަހު ރޭގަނޑު 22:30 ގައި ބަންދުކުރުމަށްވެސް ޕޯޗުގަލް ސަރުކާރުންވަނީ ނިންމައިފައެވެ.
ކޮވިޑް-19 ފެތުރުން ކޮންޓްރޯލް ކުރުމަށް ޕޯޗުގަލްއިން އިތުރު ފިޔަވަޅުތައް އަޅައިފައި މިވަނީ، އެގައުމުގައި ކޮވިޑް-19ގެ ޑެލްޓާ ވޭރިއެންޓް ފެތުރެން ފެށުމާއި ގުޅިގެންނެވެ. މިވޭރިއެންޓަކީ އެހެނިހެން ކޮވިޑް ވޭރިއެންޓްތަކާއި ހިލާފަށް ވަރަށް ހަލުވިކަމާއެކު ފެތުރޭ ވޭރިއެންޓެކެވެ.
ޕޯޗުގަލްގެ ސިއްހީ އިދާރާތަކުން މައުލޫމާތުދޭގޮތުގައި، އެގައުމުން މިހާތަނަށް ކޮވިޑް-19 އަށް 882,002 މީހުންވަނީ ޕޮޒިޓިވުވެފައެވެ. އަދި މިބަލީގައި 17,101 މީހުންވަނީ މަރުވެފައެވެ. ޕޯޗުގަލްގައި ކޮވިޑް ވެކްސިންގެ ފުރަތަމަ ޑޯޒްވަނީ 50 އިންސައްތައަށްވުރެ ގިނަ މީހުންނަށް ދީފައެވެ. ދެވަނަ ޑޯޒް ދިންމީހުންގެ އަދަދަކީ 32 އިންސައްތައެވެ.
