ކޮވިޑް-19 ވެކްސިން ހޯދުމުގައި ލީޑަޝިޕް ދައްކައިފި ކަމަށްބުނެ މޯލްޑިވްސް ތަރޑް-ވޭ ޑިމޮކްރެޓްސް (އެމްޓީޑީ)އިން ރައީސް ސޯލިހަށް ތައުރީފްކުރައްވައިފިއެވެ.

އެމްޓީޑީން މިއަދު ނެރުނު ނޫސްބަޔާނެއްގައި ވިދާޅުވީ، ދުނިޔޭގެ ގައުމުތަކުގައި ކޮވިޑް-19 އާއި ދެކޮޅަށް ބޭނުން ކުރަމުންދާ އެންމެ ބޮޑު ހަތިޔާރަކީ ވެކްސިން ކަމަށެވެ.

ރައްޔިތުންނަށް ދޭނެ ވެކްސިންވެސް ނުލިބި އެތައް ބަޔަކު ކޮވިޑް-19 ގެ ޝިކާރައަކަށްވެ ދުނިޔޭގެ އެތައް ގައުމެއްގައި އެތައް ބަޔަކު ނިޔާވުމުންދާއިރު، ދިވެހިރާއްޖެއިން މިކަމުގައި ބޮޑެތި ކުރިއެރުންތަކެއް ހޯދާފައިވާކަމަށް އެމްޓީޑީން ވިދާޅުވިއެވެ.

"ރައީސް ސޯލިހްގެ ލީޑަރޝިޕްގެ ދަށުން ރާއްޖެއަށް ބޭނުންވާވަރަށް މިވަނީ ވެކްސިން ހޯދިފައި. މިކަން މިޕާޓީ އިން އުފަލާއި ޝުކުރުވެރިކަމާއި އެކީ ފާހަގަ ކުރަން." އެމްޓީޑީން މިއަދު ވިދާޅުވިއެވެ.

މީގެ އިތުރުނ ރައީސް ސޯލިހު އިންސާނިއްޔަތުކަން އިސްކުރައްވާ ރާއްޖޭގައި މަސައްކަތް ކުރާ ބިދޭސީން އިސްތިސްނާނުކޮށް ވެކްސިން އެމީހުނަށްވެސް ހިލޭ ޖަހައިދީ، މިހާރު ރާއްޖޭގެ %61 އާބާދީ ދެޑޯޒް ޖަހާ ވެކްސިނޭޝަން ފުރިހަމަކޮށްފައިވާއިރު، %70 މީހުން ފުރަތަމަ ޑޯޒް ޖަހާފައިވާ ކަމަށާއި، މިއީ ދުނިޔޭގެ ފެންވަރުން ބެލިނަމަވެސް ވަރަށް ބޮޑުކުރިއެރުމެއް ކަމަށް އެމްޓީޑީން ވިދާޅުވިއެވެ.

"އާލަމީ ވަބާގެ ތެރޭގައި ޑޮކްޓަރުންނާއި ނަރުހުންނާއި، އެޗް.ޕީއޭ، މޯލްޑިވްސް ރެޑް ކްރެސެންޓް، ޑަބްލިއު.އެޗް.އޯ މާލްޑިވްސް އަދި ފްރަންޓް ލައިންގައި މަސައްކަތް ކުރާ ހުރިހާ ހިދުމަތްތެރިން ކުރައްވަމުންދާ ބުރަ މަސައްކަތްތައް މިޕާޓީން ހިތުގެ އަޑިން ގަބޫލްކޮށް ޝުކުރުވެރިކަމާއި އެކީ ސެލިއުޓްކުރަން." އެމްޓީޑީން ވިދާޅުވެފައިވެއެވެ.