ކޮވިޑް-19 ގެ ޕޮޒިޓިވިޓީ ރޭޓު ފަސް ޕަސެންޓަށް ވުރެން ދަށް ރަށްތަކުން ދަތުކުރާއިރު ހަދަން ޖެހޭ ޕީސީއާރަށް ލުޔެއް ދީފިއެވެ.
ހެލްތް އިމަރޖެންސީ އޮޕަރޭޝަން ސެންޓަރު(އެޗްއީއޯސީ)ގެ ތަރުޖަމާން ޑރ. ނަޒްލާ ރަފީގް މިއަދު ވިދާޅުވީ، ޕޮޒިޓިވިޓީ ރޭޓު ފަސް ޕަސެންޓަށް ވުރެން ދަށް ރަށްތަކުން ދަތުކުރާއިރު ހަދަން ޖެހޭ ޕީސީއާރަށް ލުޔެއް ދީފައިވާ ކަމަށެވެ. އެކަމަކު އެއީ ވެކްސިން ޖަހާ އުމުރު ފުރައިގެ 12 އަހަރުން މަތީގެ އެންމެން ހިމެނޭ ގޮތުން 90 ޕަސެންޓް މީހުންނަށް ވެކްސިން ފުރިހަމަ ކުރެމުންނެވެ.
ޑރ. ނަޒްލާ ވިދާޅުވީ އާބާދީގެ ފަސް ޕަސަންޓަށް ވުރެ މަދުން ކޮވިޑް 19ގެ ބަލީގެ މީހުން ތިބި ރަށަކުން، 12 އަހަރުން މަތީގެ އާބާދީގެ 90 ޕަސަންޓް ރައްޔިތުން ވެކްސިން ފުރިހަމަކޮށްފައިވާ ރަށަކަށް ދަތުރުކުރާނަމަ ޕީސީއާރް ޓެސްޓަކާ ނުލައި ސެޕްޓެމްބަރު އެކަކުން ފެށިގެން ދަތުރުކުރެވޭނެ ކަމަށެވެ. އަދި އެ މީހަކު އެދާ ރަށެއްގެ އާބާދީގައި ހިމެނޭ 65 އަހަރުން މަތީގެ 90 ޕަސަންޓް މީހުންނާއި، އެ ރަށެއްގައި ގެސްޓްހައުސް ހިންގާނަމަ އެ މަސައްކަތުގައި ބައިވެރިވާ ޖުމްލަ މުވައްޒަފުންގެ 90 ޕަސަންޓް މުވައްޒަފުން ވެސް ވެކްސިން ފުރިހަމަ ކުރަންޖެހެއެވެ.
މީގެކުރިން ބަލި އުޅޭ ރަށަކުން އެހެން ރަށަކަށް ދަތުރުކުރާނަމަ ޕީސީއާރް ޓެސްޓެއް ހަދަން މަޖުބޫރުކޮށްފައިވެއެވެ.
އެޗްޕީއޭ އިން އެންމެ ފަހުން އާއްމުކޮށްފައިވާ ހިސާބުތަކަށް ބަލާ ނަމަ ޕީސީއާރު ނުހަދައި 30 އަށް ވުރެން ގިނަ ރަށަށް ދަތުރުކުރެވޭނެއެވެ. އެއީ, އެ ރަށްތަކުން ވެކްސިން އާބާދީގެ 90 ޕަސެންޓް ދެ ޑޯޒު ފުރިހަމަކޮށްފައިވާތީއެވެ.
