ކޮވިޑް-19 އިން ރައްކާތެރިވުމަށް ޖަހާ ވެކްސިން ނުޖަހާނަމަ، ކަރަންޓީނުވާން ޖެހޭ ހާލަތްތަކުގައި ކަރަންޓީނުގެ ގޮތުގައި ގުނާ މުއްދަތު ޗުއްޓީގައި ހިމަނާގޮތަށް ބަދަލުކޮށް އިސްލާހް ހުށަހަޅައިފިއެވެ.
ސިއްހީ ކުއްލި ނުރައްކަލުގެ ހާލަތާއި ގުޅިގެން ކަރަންޓީނުވާން ޖެހޭ ހާލަތުގައި، މެޑިކަލް ސެޓްފިކެޓު ހުށަހަޅަން ނުޖެހި އެ ފަރާތްތަކަށް މުސާރަ ލިބޭ ގޮތަށް ވަޒީފާދޭ ފަރާތުން ހާއްސަ ޗުއްޓީއެއް ދޭންޖެހޭނެ މި ސަރުކާރުން ވަނީ ގާނޫނަށް އިސްލާހް ގެނެސްފައެވެ. ނަމަވެސް ވެކްސިން ޖެހުމަށް ބާރު އެޅުމުގެ ގޮތުން، ވެކްސިން ނުޖަހާ ފަރާތްތަކަށް ކަރަންޓީނުގެ މުއްދަތު ޗުއްޓީގައި ހިމެނޭގޮތަށް ގާނޫނަށް އިސްލާހް ގެނައުމަށް ސަރުކާރުން މަޝްވަރާތައް ކުރާ ކަމަށް މައުލޫމާތު ވަނީ ލިބިފައެވެ.
މައުލޫމާތު ލިބިފައިވާ ގޮތުގައި އަދި ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި، އެގޮތަށް އިސްލާހެއް ގެނައުމަށް ހުށަހަޅާފައިވަނީީ ރައީސް އޮފީހުގެ ޕޮލިސީ ބައްދަލުވުމެއްގެ ތެރެއިންނެވެ. ނަމަވެސް މިކަމާއި ގުޅޭގޮތުން މާ ބޮޑު ތަފްސީލެއް އަދި މިހާތަނަށް ހާމަކޮށްފައިނުވެއެވެ.
ވެކްސިން ޖެހުމަށް ބާރު އެޅުމުގެ ގޮތުން ވެކްސިން ޖަހާ ފަރާތްތަކަށް ދަތުރުފަތުރު ކުރުމުގައި ސަރުކާރުން ލުއި ދީފައިވާއިރު، އަދި ކުރިއަށް އޮތްތާގައިވެސް އެ ފަރާތްތަކަށް ލުއި ދޭނެކަމަށް ސަރުކާރުން ވަނީ ވިދާޅުވެފައެވެ. ނަމަވެސް ވެކްސިން ނުޖަހާ ފަރާތްތަކަށް ބައެއް ހިދުމަތްތައް ހޯދުމަށް ހުރަސްއެޅޭ ގޮތަށް އަމަލުކުރުމުގެ ހުއްދަ ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ވަނީ ދީފައެވެ.
ވެކްސިން ޖެހުމަށް ޝަރުތު ހަމަވާފަރާތްތަކުން ވެކްސިން ފުރިހަމަކުރުމަށް ބާރު އެޅުމަށްޓަކައި 2021 ސެޕްޓެމްބަރު 1 ވަނަ ދުވަހުން ފެށިގެން ވެކްސިން ޖެހުމަށް ޝަރުޠުހަމަވެ، ވެކްސިންގެ އެއްވެސް ޑޯޒްއެއް ފުރިހަމަކޮށްފައިނުވާ ފަރާތްތަކާމެދު، ވަކިގޮތެއް އަންގަންދެން، އަމަލު ކުރެވޭނެ ވަކި ޝަރުތުތަކެއް ޕަބްލިކް ހެލްތް އިން ވަނީ ކަނޑައަޅާއިފައެވެ.
އަމަލުކުރެވޭނެ ޝަރުތުތަކަކީ:
1 .ހޮޓާ، ކެފޭ ، ރެސްޓޯރަންޓް ފަދަ ކާބޯތަކެތީގެ ޚިދުމަތް ދޭ ތަންތަނުން ޚިދުމަތް ހޯދުމުގައި ވަކި ކަންކަމެއް ޝަރުތުކުރުން
2 .ޖިމްތަކާއި، ސެލޫންތަކާއި، ސިނަމާތަކުން ޚިދުމަތް ހޯދުމުގައި ވަކި ކަންކަމެއް ޝަރުތުކުރުން
3 .ޕަބްލިކް ޓްރާންސްޕޯޓާއި ޑޮމެސްޓިކް ފުލައިޓް ތަކުން ދަތުރު ކުރުމުގައި ވަކި ކަންކަމެއް ޝަރުތުކުރުން
4 .ރައްޔިތުންނާ ގާތުން ދޭންޖެހޭ އާންމު ޚިދުމަތްތައް ދޭ ފަރާތްތަކަށް (ޓެކްސީ ޑްރައިވަރުން، ވެއިޓަރުން، ޖިމްތަކާ
ސެލޫންތަކުގައި މަސައްކަތްކުރާ ފަރާތްތައް ފަދަ) ވަކި ކަންކަމެއް ޝަރުތުކުރުން.
5 .އޮފީސްތަކުގައި ވަޒީފާ އަދާކުރާ ފަރާތްތަކުން އޮފީހަށް ޙާޟިރުވުމުގައި ވަކި ކަންކަމެއް ޝަރުތުކުރުން
ރާއްޖޭގެ ކޮވިޑް ވެކްސިން ޖެހޭ އާބާދީއަށް ވެކްސިން ދިނުމަށް ސަރުކާރުން މިހާރު ވަނީ ހާއްސަ ޕްރޮގްރާމެއްވެސް ފަށައިފައެވެ. އެގޮތުން ސަރުކާރުގެ އަމާޒަކީ މި މަހުގެ ނިޔަލަށް ވެކްސިން ޖެހޭ އާބާދީގެ 90 އިންސައްތައަށް ވެކްސިން ދިނުމެވެ.
