ރަށުތެރެއިން ކޮވިޑް-19 ގެ ޕޮޒިޓިވް ކޭސްތައް ފެނުމާއި ގުޅިގެން ހދ. ނެއްލައިދޫ، ހއ. އިހަވަންދޫ އަދި ގދ. ތިނަދޫ މޮނީޓަރިން އަށް ލައިފިއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އިއްޔެ ނެއްލައިދޫ މޮނީޓަރިންގެ ހާލަތަށް ގެނެސްފައިވަނީ، އެރަށު ސިއްހީ މަރުކަޒަށް އިއްޔެ ދެއްކި މީހަކު ކޮވިޑް-19 އަށް ޕޮޒިޓިވްވުމާއި ގުޅިގެންނެވެ. އަދި އިހަވަންދޫ މިމަހުގެ 13 ވަނަ ދުވަހު ދ.އަތޮޅު ކުޑަހުވަދޫން އިހަވަންދުއަށް ދަތުރު ކުރި ހަތަރު މީހަކު ކޮވިޑަށް ޓެސްޓް ކުރިއިރު ޕޮޒިޓިވް ވުމާއި ގުޅިގެންނެވެ.
މީގެ އިތުރުން، ގދ. ތިނަދޫވެސް މޮނިޓަރިންއިން ނެގިތާ އެއް މަސްދުވަސް ނުވަނީސް އަނެއްކަވެސް ރެންޑަމް ކޮވިޑް ކޭސްއެއް ފެނިގެން އެރަށް މޮނިޓަރިންއަށް ލައިފައިވަނީ މިއަދުއެވެ.
އެއާއެކު މިހާރު އެޗްޕީއޭއިން ބަންދުކޮށްފައިވާ ރަށްތަކުގެ އަދަދު ވަނީ 15 އަށް އަރައިފައެވެ. އަދި އިއްޔެ އަކަނިވެސް އަތޮޅު ތެރެއިން 6 ރަށެއް މޮނީޓަރިންގެ ހާލަތަށް ވަނީ ގެނެސްފައެވެ.
އިއްޔެ މޮނީޓަރިންގެ ހާލަތަށް ގެނައި އިތުރު ރަށްތަކަކީ، ހދ. މަކުނުދޫ، ބ. އޭދަފުށި، ބ. ކަމަދޫ، އަދި އދ. ހަންޏާމީދޫ އެވެ. މީގެ އިތުރުން ދެން މޮނީޓަރިންގައި އޮތް ރަށްތަކަކީ، ރ. ދުވާފަރު، ކ. ކާށިދޫ، މ. ކޮޅުފުށި، ށ. ފީވަށް، ހއ. ތަކަންދޫ، ދ. ކުޑަހުވަދޫ، އއ. ހިމަންދޫ، އަދި ތ. ހިރިލަންދޫއެވެ.
މީގެ ތެރެއިން މިހާތަނަށް އެންމެ ގިނަ ދުވަހު މޮނީޓަރިންގައި އޮތް ރަށަކީ ރ. ދުވާފަރެވެ. އެޗްޕީއޭ އިން އެ ރަށް މޮނީޓަރިންގެ ހާލަތަށް ގެނެސްފައި ވަނީ މިދިޔަ މެއި މަހުގެ 25 ވަނަ ދުވަހުއެވެ.
ރާއްޖެއިން ކޮންމެ ދުވަހަކު ޕޮޒިޓިވްވާ މީހުންގެ އަދަދު މިހާރު ދަށްވާން ފެށިނަމަވެސް، އަތޮޅު ތެރޭގެ ރަށްތަކުން ބަލި ފެންނަލެއް އަންނަނީ އިތުރުވަމުންނެވެ.
