ކޮވިޑް-19 ގެ ނުރައްކާތެރިކަމާއެކު، ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިތުރު ދެރަށެއް މޮނިޓަރިންގެ ހާލަތަށް ގެނެސްފިއެވެ.
އެޗްޕީއޭއިން މޮނިޓަރިންގެ ހާލަތަށް ގެނެސްފައިވަނީ އދ.ދަނގެއްޗާއި ގއ.މާމެންދޫއެވެ. މިއާއެކު މިވަގުތު މޮނިޓަރިންގެ ހާލަތުގައި އޮތް ރަށްތަކުގެ އަދަދު ވަނީ 16 އަށް އަރާފައެވެ.
މި ދެރަށުގެ އިތުރުން މިވަގުތު މޮނިޓަރިންގައި އޮތީ، ރ.ދުވާފަރާއި، ކ.ކާށިދޫ، ށ.ފީވަށް، ހއ.ތަކަންދޫ، ދ.ކުޑަހުވަދޫ، އއ.ހިމަންދޫ، ތ.ހިރިލަންދޫ، ހދ.މަކުނުދޫ، ބ.އޭދަފުށި، ބ.ކަމަދޫ، އދ.ހަންޏާމީދޫ އަދި ހދ.ނެއްލައިދޫގެ އިތުރުން ހއ.އިހަވަންދޫއާއި ގދ.ތިނަދޫއެވެ.
ކޮވިޑް-19 އަށް މިއަދު ރާއްޖެއިން ޕޮޒިޓިވްވީ އަދަދު 130 ގައި އުޅޭއިރު، މިއަދު ޕޮޒިޓްވީ މީހުންގެ ތެރޭގައި ހިމެނެނީ، ފުރަ މާލެއިން ޕޮޒިޓިވްވީ 36 މީހުންނާއި، މީހުން ދިރިއުޅޭ އެހެނިހެން ރަށްތަކުން ޕޮޒިޓިވްވީ 86 މީހުންގެ އިތުރުން ރިސޯޓްތަކުން ޕޮޒިޓިވްވީ 8 މީހެކެވެ.
ކޮވިޑް-19 ގެ ހާލަތު މިވަގުތު ކޮންޓްރޯލް ކުރެވިފައި އޮތްނަމަވެސް ފަތުރުވެރިން ގެނައުމުގައި އުޞޫލުތަކާ ޚިލާފުވާން ފަށާފައިވާއިރު، އެކަން މޮނިޓަރ ކުރުމަށް ސަރުކާރުން ދަނީ މަސައްކަތްތަކެއް ކުރަމުންނެވެ.
